現年五十五歲的汪明荃（阿姐）入行三十六年，視其演藝事業為人生一大目標，聲稱永不言休，活到老做到老。而在芸芸藝人中，阿姐最欣賞的就是陳慧琳。 撰文：戴彩煥 攝影：林德雄
汪明荃入行三十六年，從不言倦，因為，工作便是她的人生，只要體力應付得來，她便去做，就如昨日她接受本報記者專訪時，坦言近日單是為排練下月十一日和十二日在紅館舉行的「明荃明曲明星2003演唱會Part2」，已令她體力透支，若不是為了宣傳個唱，她實在也懶得接受訪問──阿姐就是如此坦白。
阿姐說：「我希望唔同年齡有唔同嘅發揮，我重有好多嘢未做，工作帶畀我好大嘅滿足感，如果觀眾唔厭嘅話，我會一路做落去。其實作為一個藝人，應該不斷去求變更新，呢個亦都係一個藝人成功之道，試諗吓，如果一個藝人成日都係做死一套嘅話，觀眾使乜睇你啫，見嚟見去你都係咁嘅樣，係人都會厭啦！」
問到縱橫電視圈三十六年的阿姐，覺得現時哪位藝人可以做她接班人？阿姐竟說：「我好少睇電視，冇乜特別留意，你話搵我嘅接班人，其實比較難，因為我係一個多元化嘅藝人，瓣數多，你睇吓有邊個會同時唱歌、做大戲、演戲同做司儀？」
雖然電視圈未有女藝人獲阿姐青睞，但阿姐對陳慧琳（Kelly）讚不絕口，她說：「好多時合作做騷見到佢，睇住佢呢幾年真係有進步。佢本身家境好，個樣又靚，雖然紅咗，但仍不斷努力去學習，不斷求變，豐富自己嘅表演，而且又潔身自愛，受人尊重。」
阿姐續說：「你睇吓，Juno（麥浚龍）因為屋企有錢，成日俾人針對，咁Kelly屋企夠有錢啦，又唔見Kelly俾人針對？做藝人要別人尊重，就先要識得尊重自己。」
