紐卡素、車路士同伯明翰就參加下個月尾喺馬來西亞舉行嘅英超亞洲挑戰盃，紐記領隊卜比笠臣就已經講明唔單止志在練兵，目標係捧盃！
曾經喺七八年帶住英格蘭二十一歲以下國家隊，到吉隆坡踢熱身賽嘅卜比笠臣，對呢個季前熱身賽事都幾重視；佢話因為對手有同級嘅英超球隊，同埋馬來西亞都派國家隊應戰，絕對係提升球員狀態嘅一次好機會，定下捧盃目標，希望班球員更加認真比賽，到八月中揭幕戰作客列斯時，打響頭炮。
除咗「紐記」外，伯明翰領隊布魯士同樣希望球員有較佳狀態出戰，佢已經下令上季養傷多時嘅泰利比、摩利臣同A施斯提早喺禮拜二復操；我求大俠相信呢個有公仔箱直播嘅盃賽，可以幫餓波一排嘅波友暫時止吓渴。
列斯門將羅賓遜同維拉嘅洽談破裂唔過檔，好多人覺得羅賓遜唔畀面當日一手提攜佢嘅現今維拉領隊奧拉利；但我求大俠就唔係咁睇。二十三歲嘅羅賓遜係英有潛質龍門，列斯以三百二十五萬鎊賣佢畀維拉，的確少啲，以佢嘅質素，可以叫高啲價同加盟更大球會！
法甲球會馬賽落實斟日本球星中田英壽，重話如果買到佢，日本肯定會播大量法國波，淨係球賽轉播收入都唔嘢少。所以佢哋已經同法國足總講明一定要分帳。人都未到就講定呢家嘢，馬賽都幾惡，不過亦證明中田確係個優質「品牌」。
由下屆開始，梅斯達喺多蒙特會多咗個好幫手，事關多蒙特簽咗佢細佬M梅斯達。M梅斯達今年二十一歲，同梅斯達一樣踢後衞，佢可以加盟多蒙特，全靠梅斯達落嘴頭。所謂「兄弟同心、其利斷金」，𠵱家最驚嘅肯定係成日俾人話係「生銹鐵衞」嘅禾恩斯。
吐篤痰罰千五蚊港紙，如果講粗口鬧差人，你估罰幾多？答案係八十九萬港紙。將會去卡塔爾搵食嘅艾芬保，喺二月因超速而俾交通警截停，之後用粗口猛鬧嗰個差人，結果被重罰八十九萬港紙。希望艾芬保之後可以學精啲，如果第日去到卡塔爾再惹麻煩，可能唔止罰錢咁簡單，分分鐘搞到坐監或要受皮肉之苦。
米蘭雙雄賣季票宣傳時，通常都用最有影響力嘅球星做宣傳海報主角，好似AC今年繼續搵隊長馬甸尼作招徠，不過國米就搵新仔馬田斯，皆因佢喺歐冠盃對利華古遜入波後連翻幾個觔斗，出晒位。所以話，做球員唔使最好波，識出位一樣有出頭天。