鄭秀文噚日以代言人身份喺尖沙嘴出席現代美容中心舉行嘅「鄭秀文＋8大家歸瘦夠膽SHOW」。鄭秀文重親自見證八位參賽者嘅瘦身成果，見啲參賽者又扮兔女郎、又扮Twins，令擔任評判嘅鄭秀文睇到笑不攏嘴。
鄭秀文噚日電咗個爆炸新髮型，大談減肥辛酸史，佢話：「啱啱出道嗰時成個肥Mary咁，試過減肥減到暈低，一起身見到阿媽拎住碗湯叫我飲，我即刻忍唔住喊。𠵱家每日會喺屋企跳繩，通常十分鐘跳一千吓，不過前排哮喘病發，食咗啲藥成個人好腫，𠵱家已經完全康復。我鍾意食西瓜、香蕉同飲凍嘢，𠵱家要盡量戒口。」
另外，有現場觀眾問鄭秀文擔唔擔心減肥減到平胸，鄭秀文就話：「減唔減肥個身形都定咗，對我嚟講冇乜影響。」
鄭希怡（Yumiko）噚日去青衣城出席「2003-2004年度葵青區滅罪活動開幕禮」。當「龍嫂」Yumiko出場時，大會就播放由成龍主唱嘅歌曲。Yumiko不但冇尷尬，反而重模仿警察步操出場。對於黃伊汶讚佢有媚態，Yumiko多謝對方之餘重讚黃伊汶好有吸引力。
林心如同陳怡蓉無端端做咗色情廣告女郎！日本最新一期嘅成人八卦雜誌《週刊實話》入面嘅色情小廣告，登咗佢哋嘅相，配上假名同假三圍，重俾人話佢哋係韓國妹㖭！雖然跨國侵犯肖像權好難追究，不過林心如同陳怡蓉嘅經理人公司都話會採取行動，以保護佢哋嘅藝人。
英皇3T中嘅Mandy蔣雅文同Maggie劉思惠，噚日去咗灣仔出席慶回歸足球活動記招。佢哋兩個雖然着得好casual，亦冇唱歌跳舞助興，不過同樣好受在場人士歡迎，有唔少中年同老年人士爭相同佢哋影相，搞到佢哋都唔知望左定望右好，認真應接不暇！
楊采妮早前有假期，諗住去台灣，不過因為SARS去唔到，所以轉咗去日本。佢除咗學做蛋糕同懷石料理外，重學番幾句日文。講到楊采妮呢排又拍廣告又做雜誌訪問，唔知係咪想復出呢？不過佢經理人姚宜君話楊采妮只係揀適合嘅工作先至做！
饒林紅、袁文傑同珈潁噚日去尖沙嘴出席「金庸系列書展剪綵禮」。饒林紅話細細個已經好鍾意睇改編自金庸小說嘅電視劇。芸芸男、女主角之中，佢最鍾意汪明荃同鄭少秋喺劇集《倚天屠龍記》入面飾演嘅趙明同張無忌，饒林紅覺得呢兩個角色愛得好轟烈。
