估唔到葉劉淑儀竟然可以如此藐視立法會議員，大有毛澤東主席「三視」階級敵人之風。如果冇記錯，「三視」即係蔑視、藐視、輕視，其實即係當敵人冇到，睬佢都儍。當年搞階級鬥爭、搞文革，先至講三視，點都諗唔到喺二十一世紀議事堂中，堂堂大官，受過西方教育，去過英國讀英國文學嘅葉劉淑儀亦會如此。唔通回歸之後，睇咗好多次《紅燈記》、《白毛女》等等文革時期樣板戲，不知不覺中沾上批鬥氣味？
葉劉嘅表演，鳳凰女亦自歎不如。粵劇電影殘片中，鳳凰女扮西宮，惡死騰騰，鄧碧雲扮東宮，時時畀鳳凰女糟質，兩個大花旦，做得非常好睇；今之葉劉淑儀，做戲天份好過鳳凰女㖭。佢咁深入角色，值得董建華讚賞。
不值一哂嘅跑龍套配角就係葉錫恩，呢位英國老人家在六十年代，民智未開之時，扮演自由開放代表，靠住英國人身份，與政府、警方力撐，小市民曾視之為英雌。幾十年後，佢變成頑固老人，冇與時俱進，居然叫人唔好受民主派煽動去上街。佢應該老早淡出舞台啦，何必不甘寂寞？香港大學出版社為佢出版自傳，不知銷路如何？左丁山就唔會花斗零去買。六六年反天星小輪加價嘅英雄蘇守忠，雖已遁入空門都忍唔住執筆為文，指出葉錫恩新書嘅錯誤，與當年若干事實不符。如果葉錫恩早二十年完全退隱，大家重會尊重佢！