五十五歲的汪明荃是人大前委員，現任全國政協委員。對於特首董建華多年來的政績，阿姐昨日不留情面地說：「佢都做唔到嘢，乜都慢過人，淨係睇佢處理沙士問題已經知啦，乜都後知後覺。不過，佢重有幾年做，希望佢多啲關心民眾，聽多啲市民嘅意見啦！」
儘管阿姐十分關心國家大事，她卻絕無興趣在港參政，阿姐說：「以前做人大好多嘢做，我實在冇乜興趣同人拗，喺香港從政成日要同人拗，我比較有興趣我嘅演藝事業多啲。」
而對於《基本法》第二十三條立法草案，阿姐則表示支持：「我覺得咁多香港人反對立法，其實係唔滿意政府所做嘅嘢，所以趁機會宣洩出嚟啫。」而林建明日前批評特首董建華，在反對二十三條立法的七．一大遊行前接見演藝界人士，猶如做騷一樣，呼籲演藝人不要受董建華的言論影響而不參與大遊行。
阿姐對此說：「我唔會批評人哋講乜嘢，因為每個人都有言論自由，但凡事都有先後之分，佢（董建華）一直有接見好多人，見過唔少團體，唔接見嘅話又俾人話佢唔見，𠵱家見過總好過唔見吖！我覺得好多人永遠睇到自己好大，其實演藝界呢個圈子好細㗎咋！」
羅家英被公認是阿姐的男朋友，但阿姐口中的家英哥，只是好朋友和好拍檔而已；記者昨日在阿姐廣播道的辦公室跟阿姐做訪問期間，家英哥剛剛到訪，阿姐一見他，即不耐煩地說：「你嚟做乜啫，我做緊訪問呀！」家英哥聽罷說：「我上嚟坐坐之嘛！」
接着家英哥一個屁股坐在沙發上，其時記者正為坐在沙發另一角的阿姐拍照，阿姐見他坐下，即跟他說：「你坐落嚟做乜啫，我影緊相呀！」記者曾要求二人合照，但阿姐認為今次訪問跟家英哥無關，所以一口拒絕，所以家英哥逗留不夠五分鐘，便自動消失！
