譚詠麟（阿倫）和李克勤前晚在紅館舉行演唱會，並聯同好友梁榮忠表演棟篤笑，寸盡香港近日的政壇和娛樂圈新聞人物，包括特首夫人董趙洪娉、財爺梁錦松、麥浚龍父子和謝霆鋒等。但一提到七．一反二十三條大遊行時，阿倫即時封嘴，並建議克勤可多唱情歌化解民怨。
譚詠麟和李克勤前晚在紅館舉行演唱會時，照例邀請了好友梁榮忠擔任棟篤笑表演嘉賓，三人合力寸盡香港近日的政壇和娛樂圈新聞人物，又諷刺霆鋒緋聞多，日日見報，引得台下觀眾哈哈大笑。
洗手、洗手、洗手！
今次「左麟右李」演唱會的表演程序與上次大同小異，嘉賓梁榮忠出場時，竟以董太在沙士肆虐期間往牛頭角下邨時的全副武裝打扮現身，令觀眾忍俊不禁。
梁榮忠還唱道：「董太呀！誰都喜歡你，董生也自豪。」又再三提醒阿倫和克勤說：「記住洗手、洗手、洗手。最安全唔係威爾斯醫院，係牛頭角下邨嗰日。」阿倫稱梁榮忠的打扮似懵仔，但梁榮忠卻自稱是「懵太」。
一句講晒四水歸源
其後克勤大讚梅艷芳策劃的「1:99演唱會」十分成功，不妨再多辦一次，阿倫即建議說：「不如搵一個人面廣、關係多，最好日日見報嘅。」二人隨即叫出謝霆鋒的名字，阿倫揶揄說：「冇人密得過佢，如果霆鋒嚟，又可以帶王菲、栢芝、盧巧音、趙學而同鄭秀文。」
克勤和梁榮忠又七嘴八舌地接道：「栢芝又可以叫小春、東東（陳曉東）同陳冠希；小春又可以叫車婉婉；車婉婉又叫安仔（許志安）；安仔叫鄭秀文；鄭秀文又可以叫古仔（古天樂）；古仔就叫郭羨妮，佢又叫溫兆倫。而盧巧音又叫余文樂、阿嬌（鍾欣桐）、Cookies同Shine。」阿倫說：「一句講晒，叫佢就可以四水歸源，呢個演唱會叫『一拖九十九．心連心演唱會』。」
呢啲問題我唔講！
而提到林子祥（阿Lam）早前在汪明荃的演唱會上，失足跌落升降台受傷一事時，梁榮忠問阿倫可知內情，阿倫即大聲問在場觀眾說：「你哋覺得我係咪知？」觀眾齊聲答：「知。」阿倫又問：「咁跌落去嗰個係咪應該係我？」觀眾又答：「係。」阿倫即反問：「我真係跌落去，你哋於心何忍？」
後來他們又讓觀眾投票台上三人中誰應跌落台，觀眾指是梁榮忠，但梁榮忠反指是梁錦松，全場觀眾即拍手支持。阿倫說：「唔好再提買車件事，一陣話你毀壞國寶（指伏明霞）。佢受過訓練，國寶會教佢，佢識打觔斗跌落去，攞十分咁跳落去。」後來阿倫等三人又提到楊永強應否跌落洞，克勤說：「佢跌落去都冇事，佢控制醫療，一定醫得番。」
其後克勤演繹了歌曲《合久必婚》，阿倫說：「克勤唱情歌可以化解民怨，七．一唔使上街。」而克勤則避忌地說：「呢啲問題我唔講。」二人大膽揶揄政界和娛樂圈是非人物，但一提到七．一遊行卻如此避忌，可謂十分奇怪。
我冒犯咗華仔老竇！
至於在另一環節中，克勤和梁榮忠又舉例甚麼藝人應配對舉行演唱會，他們表示藏毒罪成的杜德偉和在台灣接受過勒戒的蘇永康可以合作，二人還可以找「排毒美顏佬」做贊助。又建議劉德華和麥浚龍（Juno）可合作搞「劉德華．Juno擦出火花演唱會」，克勤說：「搵佢老竇贊助。」梁榮忠說：「你唔好亂講老竇，一陣寄信叫你道歉。」克勤即答：「我唔係講Juno老竇，我指劉德華老竇，劉德華都有老竇，唔好成日以為得佢一個有老竇。」
阿倫、克勤和梁榮忠完騷後即在後台公開讀出一封道歉信。克勤站到枱上說：「張枱好穩陣，我哋向受影響嘅圈中圈外人士深表歉意，對白內容出發點係博取觀眾一笑，並無惡意，敬希原諒。」克勤說：「我只係冒犯咗華仔老竇。」而阿倫則補充說：「我信知錯，先講sorry就冇事。」
採訪：李珮洳
攝影：林德雄
