遭未婚夫霍紹裘揮拳擊傷臉部的張慧儀，昨日在母親的陪同下召開記者會，她表示該段感情已畫上句號，並失去對婚姻的美麗憧憬。張慧儀在記招上兩度落淚，而其母則慶幸女兒結不成婚，沒有把一朵鮮花插在牛糞上。
張慧儀和拉丁舞王未婚夫霍紹裘感情亮紅燈，她報稱被霍紹裘揮拳擊傷臉部，報警求助，不過霍紹裘則指張慧儀掟爛他的電話和扯爛他的衣服，警方將案件列作毆打有人受傷及刑事毀壞案處理。
張慧儀昨日下午三時由朋友陪同到尖沙嘴警署報到，其後獲無條件釋放，四時左右離開。至下午五時許，張慧儀在母親的陪同下到佐敦一間製作公司召開記者會，她表示今次是最後一次向傳媒交代事件，說到傷心和激動處時，她更兩度落淚，其母即時遞上紙巾讓她拭眼淚。
張慧儀說：「呢段時間我已經諗清楚。由我決定結婚嗰一刻開始，我係諗住一心一意同另一半過以後嘅生活，兩個人相處最重要嘅元素係坦誠同信任，只要其中一方唔坦誠，就會對對方造成傷害。亦因為我對佢（霍紹裘）嘅坦誠同堅持，好多時同佢由討論去到辯論，估唔到有人會做出衝動同鹵莽嘅行為，估唔到據理力爭造成咗今日被攻擊，亦被假設性嘅問題對我造成人身攻擊，我非常失望。由有人做出鹵莽行為呢刻開始，我已決定為呢段感情畫上句號。」
張慧儀續道：「關於假設性嘅問題，我唔想再回應，相信透過言談舉止，大家會知道一個人嘅修養同品性。比較適合做我另一半嘅人要真誠、做人處事要光明磊落、頂天立地，今次我喺感情路上跌低咗，希望可以作為借鏡，提醒年輕人要謹慎去選擇，冷靜去了解身邊嘅伴侶。今次事件，最難過係我父母同屋企人，我要多謝為我擔心同難過嘅人，公開同佢哋講聲對唔住，呢件事令我感受到呢個圈嘅溫情。我失去咗對美滿婚姻嘅憧憬，但呢啲已成為過去，我得到人生更加要珍惜嘅嘢。」
問張慧儀警方是否已撤銷對她刑事毀壞的起訴，張慧儀激動地說：「冇錯！因為證據不足。事實就係事實，有做過就應該夠膽企出嚟認！」霍紹裘曾暗示張慧儀精神以及私生活都有問題，對此她說：「假設性嘅人身攻擊我唔回應。我唔係儍嘅，對住唔坦誠嘅人，我會有情緒波動。搞到咁唔愉快，我問心無愧。事件發生之後，我冇同佢聯絡，𠵱家心情好番啲，希望大家可以畀我一啲喘息空間。」
問張慧儀母親可有因為女兒婚事告吹而失望，她說：「冇，反而我好慶幸，我個女唔係一朵鮮花插在牛糞上！」
昨日記者致電霍紹裘，對於張慧儀召開記者會，霍紹裘說：「好多嘢我唔想講，我會繼續教學生，唔想俾呢啲嘢影響我情緒。」至於與張慧儀感情劃上句號，霍紹裘則說：「呢樣我哋一早已經傾好咗㗎啦，係雙方agree（同意）咗㗎，不過喺朋友立場，我重係關心佢嘅。」
採訪：卓寶花
攝影：仇志德
