日本本田汽車於日前公布咗五月份汽車製造、銷售及出口數據，表現除能令人感到滿意外，其中海外生產線嘅產量，更較去年同期上升多達14.9%㖭！
喺廠方所公布嘅數據中顯示，本田汽車五月份響日本本土嘅生產線，合共產製出87,972部新車，成績較2002年同期下跌19.7%；但海外生產線卻有多達14.9%升幅，合共產製出155,096部新車，若以單一地區計算，其中亞洲區升幅最為顯著，上升幅度為69%，產量多達26,609部，而北美地區亦錄得5.4%升幅，產量更達106,301部。
至於本土銷售方面，表現就來得略遜，若連商用車及小型車輛計算在內，五月份只售出51,709部新車，較2002年同期下跌21.4%；但Fit（即港版Jazz）仍然係本田車系內最好賣嘅車款，五月共售出14,777部，而Life（7,330部）及Mobilio（4,609部）則緊隨其後。另一方面，由日本出口往其他地區嘅汽車數目為38,930部，比去年同期上升0.7%，其中出口往歐洲地區嘅車輛數目佔10,484部，上升幅度為66.7%。