有個星期日得閒無聊「貢」入小欖放風箏，重畀我識埋香港風箏會會長陳生，見佢七十幾歲老人家放隻超巨型紙鳶認真佩服。咁好機會梗唔會放過，即刻同佢混熟偷吓師，佢即時教咗我三個秘訣，掌握得好，細路都可以做風箏高手。
記者：黃婉冰 攝影：陳陶鈞、梁細權
ImageGirl&Boy：Zoe、Duncan
唔好以為風箏來來去去都係得菱形和三角形，毫無變化。其實有啲款式可以好特別，甚至令你意想不到，唔信？今日就畀你大開眼界。
見過狗仔跳降落傘未？呢隻風箏只要放到半空，狗仔頭頂個入風口一充氣，隻狗仔就會變成立體，遠望就好似隻狗跳緊降落傘，成隻用尼龍製成，夠晒「襟」玩。
大眼睛最勁係有一條長達五、六米嘅尾巴，放起嚟夠晒搶鏡，但老闆娘話咁大隻一定要用魚絲先得，初學者玩都無問題㗎！
邊度有得賣：風之谷
地址：小欖跳蚤市場T1,T2號檔
淨係睇造型已經夠晒煞食，放埋上天重厲害，七品芝麻官對眼、眼眉和兩撇鬚分別會上下、左右咁郁，全隻用上絲絹做成，紮作工、畫工同樣精細，栩栩如生。
螃蟹同七品芝麻官一樣係機械風箏，立體蟹身，飛起時蟹拑同眼珠會郁動，離遠睇就好似有隻蟹在半空橫行，幾得意。
邊度有得賣：訂做電話24779867
小欖風箏場
地址：屯門青山公路小欖青發街59區樂安排小欖跳蚤市場
電話：24302299
交通：可在荃灣地鐵站E出口對面乘搭接駁巴士，另有500個露天車位，$5全日任泊。
論放風箏資歷，相信無人及得陳火光，佢八歲開始自製風箏，玩到家陣七十幾歲，重做埋香港國際風箏會會長。屋企風箏多達百幾隻，搵佢教路啱晒，家陣就等佢教番幾招！
玩風箏同其他戶外活動最大嘅分別係架生夠簡單，一個線排加一隻紙鳶已經足夠。放普通平面風箏可以用線或魚絲，但魚絲會比較堅韌；放較大隻和巨型嘅風箏就要用呢種織網尼龍麻繩，其韌力比魚絲更耐用。
放風箏最難嘅就係起鳶，陳生話起鳶時要迎風，線起碼要預留十呎或以上嘅長度，當一有風時就即刻拋高，如果線太短會因為放唔切線而令風箏飛唔起而下墜。
成功起鳶後，要留意風勢，有風要放線，愈高愈有風，所以盡量畀風箏飛得高；無風就要收線，令其保持在空中。陳生話風箏外形大細難度一樣，只係風勢唔同，如果放普通細風箏起碼要二級風，放大隻的話就要等四級風先得。
除咗放風箏，重可以去行吓跳蚤市場，萬幾尺面積鍾意點行都得，還可以釣蝦。即場有人幫你用微波爐叮熟，釣幾多食幾多，唔食又可以自己帶走，悉隨尊便。
收費：頭15分鐘$20，之後每分鐘$1。
營業時間：星期六、日及公眾假期上午11時至下午6時半。
風箏場再向前行有一個小型高卡車場，車場設備齊全。最近重增設濕玩，遇着落雨更有雨褸同水鞋提供，玩到水花四濺，十足玩飄流咁，夠晒刺激，可以過足車手癮。
收費：成人$100/10分鐘或$200可租車3次，每次10分鐘。
另有多個非繁忙時段優惠價供選擇。
備註：12歲以下小童需先上2小時堂學習駕駛技術，收費$450，其中包括10分鐘任玩時間。
營業時間：星期一至日及公眾假期（上午9時至晚上11時）