瘦身！瘦身！瘦身！相信每一位女性，都希望自己擁有好似鍾麗緹拍台灣《蘋果》廣告嘅「至Fit身形」。有婦女團體睇唔過眼，香港瘦身成風，纖體廣告無處不在，搞到個個肥女人、甚至瘦女人都備受壓力，猛嗌要減肥、減肥、減肥。
婦女團體「不示弱女人」嘅七個代表，原本諗住趁噚日現代美容中心請纖體代言人鄭秀文出席講座時踩場，喺講座舉行嘅地方，當住幾十個好想瘦身嘅女性同埋鄭秀文面前大聲疾呼，希望呢班女性回頭是岸。
好可惜，佢哋唔記得Sammi鄭秀文係大明星，通常唔會行正門，唔知幾時、Sammi唔知喺邊個門口入咗會場，結果班「不示弱女人」喺美容中心門口企咗成粒鐘都等唔到鄭秀文，最後只好係咁意舉吓橫額、嗌吓口號。
呢班姊妹又踢爆，當女士們乖乖奉上纖體費時，某纖體公司一年可以賺成一億七千萬，認真犀利。
傳真︰2623-9278
電郵︰