近年釣魚已成市民大眾其中一種熱門消閒活動，而這股釣魚熱早已吹到足球圈，不少球員閒時就會垂釣自娛，南華足球隊門將鍾皓賢三年前誤打誤撞認識了磯釣，自此就愛不釋手。「賢仔」笑說，雖然技術平平，但釣魚過程可磨練耐性，這點對踢波多少有點幫助。這名港隊門將在暑期休戰期又再提起魚竿，享受磯釣樂趣。圖/文：曾雁平
鍾皓賢說：「有次在朋友屋企睇咗盒磯釣錄影帶，當時好好奇，點解揸住支咁長嘅竿都可以釣到魚；記得三年前嘅暑假，快譯通宣布散班後一直冇班落，閒聊在家，就膽粗粗去到屋企附近嗰間賣釣魚用品嘅舖頭，重同人講話想學磯釣，就係咁樣開始。」除了鍾皓賢，李健和、鄭嘉良及黃志強等都是釣魚「發燒友」。
「賢仔」話學習磯釣期間認識了班磯釣發燒友，其後更加入了他們所成立的「金濤磯釣組」，閒時就隨「釣友」到屯門及西貢等地；或到外礁（港外）釣魚。他說：「初時都懷疑自己可唔可以坐定釣魚，但愈玩就愈投入，試過落大雨都照釣，講真，釣魚的確可訓練耐性，𠵱家就算冇收穫，都可以連續坐喺度六、七個鐘頭。」
球員生涯多次因衝動而犯錯的「賢仔」表示，學懂釣魚後，令自己可以更冷靜及以平常心應付任何事情。他說：「其實釣魚同踢波有啲相似，除技術外，還要講求運氣。年幾前有次去灣仔會展對出岸邊釣魚，喺完全估唔到嘅情況下釣到成兩斤幾嘅黑𩶘，意外得嚟又有滿足感；自從釣魚後，我再冇以前咁心急同衝動，更可沉着應戰。」
他說，釣魚另一樂趣是能接觸大自然，「香港地少人多，壓迫感好大；每次到空曠地方釣魚，呼吸新鮮空氣，吹吹海風，嗰種感覺好舒服。有次去外礁釣通宵，望住太陽升起，景色靚到唔識形容，我重將釣魚視為減壓活動。」
出生日期：15/04/71（32歲）
身高：1米76
體重：68公斤
現效力球會：南華
位置：門將
磯釣幾耐：3年多
