近年車壇興起嘅一股MPV熱潮，至今還未有減退嘅迹象，而新車款重愈出愈多㖭！日產汽車亦於日前宣布，佢哋將於日本本土推出新版Presage，實行與其他MPV車款對着幹。
新版Presage外形明顯較舊有型號來得更吸引，圓渾車身線條襯以全新車首設計，望落別具有一份吸引力，而左右雙趟門及可作兩截式開關嘅尾門配搭，亦方便乘客上落車及提存儲於尾廂嘅物件呢！同屬全新設計嘅車廂布局，三排座椅可按不同需要而收摺放平，以增加尾廂載物容量，加上長軸距組合，從而可給予車上乘客有更寬敞闊落嘅乘坐空間。當然車內重有齊各項設備，同埋多個安全氣袋連充氣簾幕組合，務求為乘客帶來更多方便及更充份嘅保護呢！另外，廠方又為選擇新版Presage嘅用家，提供有2.5直4（163匹）及3.5V6（231匹）引擎供選擇，性能表現可謂毋庸置疑。未知身處香港嘅車迷，有無機會同佢見面呢？