高寶綠色（274）昨日復牌，澄清「三免三減」稅務優惠，股價有反應，早段搶上1.27元，收1.23元，仍升逾3%。
高寶有件公司輪722，昨日威過正股好多，由3.6仙飛上5.5仙收，大升53%，升輪榜上排頭位。722價位細，成交疏，升幅好易誇張。
公司獲稅務減免，肯定有利，正股消化獲利貨後，照計重有水位。不過，722就玩唔過，睇吓數據就知道。
隻輪今年12月30日到期，得半年時間玩，溢價去到70.3%，槓桿率27.3倍都冇用，行使價2.05元，同正股現價1.23元差幾條街，揸到尾多數冇剩。（你估正股半年內狂升67%以上嘅機會有幾大？）
睇好高寶前景，都係直接買正股化算，至少買賣活躍，隨時可以計數。722交投好疏，昨日成交69張金牛有找，好難轉身。
汽車股是日發威，華晨（1114）升3.5%，慶鈴（1122）同駿威（203）均升逾4%。
華晨同慶鈴冇輪，駿威則有兩件，9701彈升17%，9746有15.5%進帳。論數據，兩件駿威輪都唔講得標青，相對比較則9701好啲，11月尾到期，3.5%溢價，4.5倍槓桿率。正股有大行品題，但升幅已唔細，想玩駿威輪，都係等回番多少至郁手。
章盛