西甲聯球會巴塞隆拿委任咗荷蘭名宿列卡特做教練後，巴塞組軍即刻有所動作，將三大南美球星列基美、祖雲尼及洛咸碧克掛牌，又唔續借用拉素嘅中場文迪達，但就全力爭取買斷拉素嘅阿根廷後衞蘇連。
不過，列卡特一上任，就要面對麻煩嘢，之唔係佢鄉里古華特扭花臣，話要走囉！據悉，年薪四百萬鎊（約四千八百萬港元）嘅古華特，係巴塞最高薪嘅球員，但佢合約就列明球會有權將佢人工減半。當古華特得知巴塞有意同佢減薪時，佢就即刻嗌走，重話英超聯球隊阿仙奴已經向佢招手，話之你列卡特係同聲同氣嘅荷蘭人，一於鄉里都冇情講！
如無意外，皇馬亞洲之旅首場比賽前，會喺昆明市嘅雲南紅塔基地集訓一個禮拜。紅塔預咗每次練波會有成過萬人到場睇，所以負責人表明球迷要畀錢先可以睇。我求大俠對呢個安排並唔驚訝，話晒咁強陣容球隊訪華都算係近年罕見，既然係商業之旅，大家都希望搵番筆㗎啦！
西甲聯喺幾日前先至煞科，啲球隊嘅職球員亦開始放暑假，但下屆由畢爾包過檔史浩克04教波嘅希歷基斯就冇得放。事關德甲喺八月初開番波，加上喺下月中又有德甲聯賽盃打，所以史浩克喺周中就經已開番操，但有新工番，唔介意啦！
前阿根廷國腳中場奧迪加認真大鑊！呢名二十九歲球員喺去年夏天先加盟土耳其球隊費倫巴治，但踢唔夠二十場，就話同隊友唔妥，走咗返阿根廷，結果被國際足協判佢毀約，罰停賽至○三年結束同重罰九百五十萬歐元（約八千五百萬港元）。你叫奧迪加點籌咁多錢呀？
據講皇馬前鋒魯爾對會長佩雷斯踢走教練迪保斯基隊長希亞路一事好唔合皮，搞到兩人唔啱牙，最近更傳出佩雷斯火滾起嚟，話可以半價賣走魯爾，然後用三千萬鎊買埋奧雲仔代佢。我求大俠就話，呢個佩雷斯坐言起行，做嘢快手快腳，魯爾你都係收口好喇，否則你要離隊，而英超又少一件巨星㗎啦！
熱刺新兵普斯迪加，話自己細細個已經係熱刺Fans，點知前日熱刺開記者會公布佢加盟嗰陣，有記者問佢最鍾意邊個熱刺球員，竟然一個都答唔出！之後呢個二十歲後生仔重話，熱刺係好球會，不過唔排除將來轉投更大球會嘅可能。擺明當熱刺係踏腳石，睇嚟佢對熱刺真係冇乜歸屬感噃！