自由黨主席田北俊真係識時務，入咗行會之後，黨章都改埋，將黨章內列明二○○七年或以前直選特首、立法會全部由直選產生嘅目標取消，改成按實際情況，循序漸進發展民主體制，即係乜都得。
八方問創黨主席李鵬飛點睇，佢話一早就喺電台講晒：「非常失望，非常遺憾」。飛哥好冇癮咁話，十年前，即係九三年創黨之時，諗住十五年後香港冇可能冇全面直選，所以將呢個目標寫入黨章，盼黨員努力；佢自己亦身體力行，九五年參加直選，希望打贏民主派，透過直選參政。可惜飛哥喺直選中輸咗，之後，自由黨冇人肯再去直選。
田北俊早兩日話佢知，飛哥雖然唔同意咁改法，因為違反佢當日創黨嘅理念；不過「一朝天子一朝臣」，佢已經冇參加自由黨嘅任何會議，所以飛哥話唔會再同自由黨討論政治問題，自問亦冇資格。
八方見飛哥意興闌珊，可能遲早會退出，不過現在可能重有啲唔捨得。佢都有讚田少坦白肯認衰，如此改法，即係反對○七年直選特首，實際係政制大倒退，走回頭路。
十年人事幾番新，邊個諗到老董會做十年特首，田少會入行會，重想做第三屆特首？
傳真︰2623-9278
電郵︰