六年前Freda剛做空中小姐，因利乘便下開了一間專賣歐洲名牌貨的店舖。和居於比利時的男友維繫感情，就只有靠飛往比利時的工作時間和男友見面，發展了三年後，男友願意為她留港工作，而她亦甘願為男友放棄當空姐，這份感情在互相遷就下慢慢培養。
記者：黃婉冰 攝影：陳偉強
做了五年多空姐，Freda發現最大的犧牲是感情生活，「做空姐感情生活好空虛，經常長期一個人喺出面走，感覺好孤獨，好想有人倚賴和傾訴。好多人以為做空姐易識男仔，其實唔係，我都試過同香港男仔發展，但大家時間根本唔夾。記得當時我和現任男友剛開始發展，在比利時每次見面只得三、四日，感覺開始熟絡時又要走，跟住見面時又要從頭再嚟過，關係好難維繫。」
Freda的男友在比利時土生土長，長期於歐洲工作，「我哋喺香港認識，佢返咗比利時後就只靠出Trip和辦貨時順道去見佢，要維持LongDistance關係最緊要有溝通，見唔到面又聽唔到聲好易會離心，我最高紀錄試過一個月用四千幾蚊電話費。」
Freda已於半年前放棄空姐工作，全心全意打理店舖生意，男朋友亦為了她留在香港工作。「如果有公司聘請我而又飛歐洲線的話，我才會考慮。」對於今次男友肯為她留在香港，她表示好感動，所以若男友要求跟他返歐洲定居，她亦甘願放棄所有，「現時市道唔好，六年生意唔想放棄，但如果佢真係開到聲叫我跟佢返去，我會放棄。」