結算日恒指收市升51點，最高曾重上9700大關，報9711，但大戶刻意㩒住在9600水平結算，7月期指低水41點。由於下周二又係假期，唔少人趁機會出外散吓心，加上七．一大遊行，相信下周一都係靜市居多。
藍籌上升股較多，國企亦一樣，鋼鐵股繼續有大盤買住，馬鋼（323）始終係主角，升4仙，成交1.52億元，又躋身10大榜內。噚日推介隻山東國電（1071），基金同大行買到唔停手，收2.225元，升4.7%，暫時冇得回。基金買盤噚日又轉到汽車股身上，華晨（1114）、駿威（203）同慶鈴（1122）都升3%至4%，另外隻第一拖拉機（038）亦有大行垂青，掃到上0.88元收市，大升8.6%。基金同大行咁樣買國企，肯定有智珠在握，筆者相信係同QDII有關，而且唔使等好耐，未來幾個月就係豐收之時。
講番細價股，大慶化工（362）低開高收0.385元，升1仙，成交增加，走勢已有突破之兆，一衝破0.39元的高位阻力，下一個目標直指0.47元。03年度（6月年結），大慶盈利料9000萬元，每股盈利10.2仙，即使升上.47元，PE亦只係4.6倍，況且04年度盈利仍會有理想增長。
今年初，衝浪平台（8178）股價大幅滑落，由0.25元跌到0.1元，正常推測，公司一定有問題出現，今次宣布業績，證實市場推測沒有錯。03年度（3月年結），衝浪營業額2670萬元，升22.3%，但虧蝕1044萬元，而對上年度則獲利347萬元。公司期內失去一重要客戶，係由盈轉虧的主要原因。至於非典疫情蔓延，亦對公司有負面影響，預計會在04年度的首季反映。
為拓展市場及穩定客源，集團已重整銷售模式，採取進取及直接的銷售策略，以替代過往「代理」的方式，預期利好影響可在下半年的業績內反映。另外，今年主力銷售的新產品XteamServer4.0d-class和WebMail5.1，在6月非典受控後，定單情況已漸入佳境。
以一家年經營開支只約2000萬元的公司而言，轉盈並非難事，而現時衝浪市值亦不過7000萬元，低潮已過，復甦可期。
郭兆誠