唔好以為我羅拉淨係識周圍八,查實我重係潮女一名,因為近排我已經日日戴住日本明星勁hit嘅earhanger(耳架),即係勾喺耳仔度、一抽好多條嘅吊鏈,日本娛圈一班有型仔女,好似成宮寬貴同優香咁,就去親邊都戴住,佢哋話只係戴一隻耳,重要一大抽,如果唔係就好娘!
我羅拉不嬲覺得男人戴長身耳環好女人,但可能成宮寬貴一向妖妖哋,戴earhanger真係幾有款。佢提醒有興趣買earhanger嘅朋友,要買條吊鏈可以隨意換嘅,先可以日日有新鮮感,重有啲頭髮起碼要到耳仔咁長,如果唔係隻耳勾就好似魚鈎咁,唔多好睇喎!而玉女上戶彩呢排就經常戴隻earhanger出現,即刻yeah咗唔少。
其實earhanger可能會比較誇張,或者唔係太啱斯文嘅靚女,咁大家可以學吓優香、片瀨那奈同hitomi咁,戴番earhanger嘅始祖串串耳環,郁起嚟都好有動感㗎。