下星期二（七月一日）唔少人話要去上街示威，包括沙田陳師奶在內。劉慧卿上街唔奇，陳師奶係普通家庭主婦，都話要參加示威，就令左丁山奇怪，問佢點解，陳師奶話：「主婦唔上得街咩，我哋成班太太團已經畀特區政府悶到嘔，不吐不快，要上街表表態，話畀董建華聽，我哋好唔鍾意佢！」
如林行止所講，你有你上街，我有我行事，市民奈政府乜何，明知不可為而為之，示威市民值得香港人驕傲。一位讀者PeterChan來電郵話，上街只上一次，市民條氣唔順都冇符，政府已計算在內咯。Peter建議香港人長期抗戰，就係出襟章（搵有心人設計，平賣）表示不滿，請不滿政府嘅市民人人戴，日日戴。呢條橋唔錯，亦可以出貼紙sticker貼在汽車玻璃，貼紙上嘅口號可以請林振強諗諗，擔保既幽默又刺激。左丁山冇乜創意，都諗出一兩條，就係「歡迎溫總理，反對廿三條」（七月一號用），我哋歡迎國家領導人訪港，但反對假借國家安全名義，製作惡法打壓新聞言論自由。
講開國家，一位Arthur讀者來電郵話近一兩年替母校（美國名校）會見申請入學學生，發覺一啲中國學生考GNA分數高到極（七百分以上），但英文會話就極之差，幾乎唔識講，Arthur懷疑內地學生只識考試，申請表都可能係代理人代寫嘅。如果呢種態度不改，美國大學取錄中國學生，要另訂標準至得。