偶像男歌手嘅唱片銷量以前都幾好，可惜佢啲負面新聞源源不絕，𠵱家佢嘅賣碟成績差過班新人成條街，偶像男歌手惟有不停藉緋聞博宣傳，希望挽救人氣，但唱片公司就好擔心，驚佢過唔到呢個低潮，所以狂掟錢幫佢造勢。而偶像男歌手嘅師妹，就因為咁被拖累，無端端做咗犧牲品。
女歌手啲唱片不嬲賣得，亦有唔少好歌，唱片公司原本構思同佢出精選碟，重預咗筆錢用嚟出電視廣告。
點知偶像男歌手張碟成績大不如前，唱片公司臨時轉軚，決定延遲同女歌手出精選碟，將原定精選碟嘅廣告費撥畀偶像男歌手，加碼做佢嘅唱片宣傳費。女歌手知道後當然好冇癮，但敢怒不敢言。
偶像男歌手雖然多咗大筆宣傳費，但唱片都係唔賣得，馮仁昭覺得佢再做懶紅嘅假象好嘥氣，佢唔好搞咁多新聞，學吓點樣去做人，同做好啲歌好過啦。
成龍主演嘅新片《飛龍再生》（前名《Highbinder》）八月會喺內地同美國一齊上映，呢部戲嘅製作費高達三億，但有跑慣江湖嘅專業人士睇過，話呢套片似六億幾大製作，講嘢真係夠客氣。而《飛》片導演陳嘉上日前接受網頁訪問，佢話：「好簡單，我哋拍戲嘅熱情超過成本。」
簡炳墀日前出席公開場合時，取笑謝霆鋒唔應該靠女人宣傳博出位，霆鋒聞言後認為對方唔應批評佢。噚日簡炳墀接受新城電台訪問時話：「講過嘅嘢令霆鋒唔開心就算，我係一番好意，一個人應該靠自己，唔宣傳係唔掂。我見盡娛樂圈離離合合，所講嘅只係經驗之談。」
黃伊汶噚日去商台接受訪問，近日又有傳聞話佢同鄭希怡（Yumiko）口和心不和，黃伊汶否認之餘，重猛讚對方又嬌又靚。喺閒談間，記者講起Yumiko曾經同成龍傳緋聞，而黃伊汶都有人錫，黃伊汶衝口而出話：「寶嫂（同她傳緋聞嘅唱片公司高層陳少寶）？梗係唔係啦！」
噚晚喺台灣舉行嘅「HITO流行音樂獎」二○○三年第二季華語十大金曲頒獎禮，蔡依林係得獎歌手之一，佢嘅專輯《看我七十二變》突破二十五萬張銷量。
𠵱家蔡依林籌備緊新專輯，預計喺年尾發行，因為今次張唱片好賣，所以佢話會更用心做新專輯嘅製作喎。
