杜德偉藏有大麻一案昨日宣判，杜德偉被判罰款四千元及留案底。對於兒子須留案底，張露大感無奈，惟有提醒兒子減少流連夜店，及切勿再交損友。杜德偉女友周汶錡則希望外界日後能錫住男友。
四十一歲的杜德偉，去年在跑馬地夜店StudioOne內被搜出藏有大麻一案，昨日在東區裁判法院宣判，杜德偉被罰款四千元及留案底。其母張露昨雖未有陪兒子出庭，卻耐心地在家中等結果。記者昨日下午五時許致電張露時，原來杜德偉還未通知母親有關判決。
記者告訴張露杜德偉要留案底時，她失望地說：「唉吔！要留案底呀！咁小事都要留案底？喺外國嚟講呢件係好小嘅事啫。不過，留案底都冇所謂啦，反正佢唔會再犯。我諗唔會上訴，我冇咁好精力，件案都拖咗好耐，總算有個了結。」
問張露會否着兒子用碌柚葉沖涼一洗霉氣，她表示不會：「身體健康就最緊要，計我話叫佢飲杯涼茶就真，但佢台灣嗰邊有嘢做，陣間佢要即刻返過去。」
問張露可會提醒兒子日後要加倍小心，不要再犯同樣錯誤？張露語氣肯定地說：「梗係會啦！我叫佢以後再唔好亂識朋友，之前佢因為啱啱得閒先至同朋友落去嗰啲地方玩，我叫咗佢以後少啲同嗰班朋友來往㗎啦，就算去到台灣嗰邊，都盡量少去夜店。」
而杜德偉哥哥杜德智早年亦曾因藏有大麻罪成，被判罰一百二十小時社會服務令。
此外，杜德偉女友周汶錡正在西班牙工作，她得悉判決大感訝異，問她是否覺得判罰太重？她透過長途電話說：「都冇乜嘢，重唔重都改變唔到。」會否擔心留案底有損歌手形象？她說：「定有影響，但事情去到咁，希望大家錫住佢，唔好再講咁多就最好。」
採訪：戴彩煥、林妙萍
攝影：陳慧安