阿董口口聲聲話要大市場小政府，但又繼續對樓價指指點點，話希望樓價回升，簡直自相矛盾。阿虎睇到孫公對阿董言論所作嘅回應，真係感覺到孫公萬般無奈。
其實香港樓價下滑，除咗經濟衰退及供過於求之外，就係因為阿董經常對樓市指指點點，令市民及投資者唔信樓市係由市場力量主導，亦唔信樓價真係見底，佢哋又點敢入市呢！孫公出完9招之後，多次強調樓市要重新由市場調節，其實係有原因。阿董，你重要製造幾多個負資產才肯收口呢？
本港兩大地產股新地（016）及恒地（012），噚日都係先升後回，港股只升51點，市場對阿董托市言論的反應，大家心中有數。阿董，政府的職能是定策而唔係定價。
市場噚日傳出嘉里建設（683）會調高私有化作價，由9.50元調高至10-11元。不過嘉里已寄出私有化文件，相信提價的機會十分微。財務顧問亦話唔建議小股東接納私有化，呢種情況下，芬佬如CapitalGroup等相信唔會接納私有化建議，私有化計劃拉倒的機會極大。
嘉里噚日大跌6.3%，收8.85元。嘉里炒私有化消息，是由6元水平起步，炒上9.40元水平，私有化計劃拉倒後，股價隨時跌回6元，甚至跌破此關。
黑客話，據聞嘉里早前受到專炒私有化概念股嘅基金吸納，一旦私有化告吹，沽壓會相當大。不過，恒發（097）私有化不成，跌完之後又升番，已是一個先例，如果本港樓市真係如阿董所望向好，嘉里仍有機重上9.50元水平。
阿虎