昨日，政府終肯重新修訂汽車首次登記稅，有朋友同亞Mark講，話終於畀你等到啦！坦白講，一個有遠見嘅政府早就應該與時並進，遲到6月中至修訂，查實對恢復車市真係幫助不大，但總好過唔改，否則香港車市只會直跌谷底；若能做到去年嘅銷量經已係萬幸，重話想收多三億半？講番正題，早排本田引入嘅新Accord，有口痕友話部車不復當年咁有號召力，綜觀現今車壇，多部日本中型房車都走斯文路線，反而新近推出嘅富士Legacy重有睇頭啦！咁又係，雖然好多傳媒都將焦點放響LegacyB4或2.0公升Turbo版身上。查實以Legacy新版趨時嘅造型，配合160匹2.0公升自然吸氣偈，可謂更具吸引力，大家不妨拭目以待喇！