立法會前日通過汽車首次登記稅嘅新稅率，由原來提出最高嘅百分之一百五十，減到百分之一百，但對於郭富城同馬清偉、馬清揚呢班車癡嚟講就冇乜幫助。話說全球限量三百九十九部嘅法拉利全新型號Enzo，香港獲配額大約六部，車價要成五百萬，但馬清偉、馬清揚、關兆昌同郭富城都照訂可也。
馮仁昭原本以為政府減稅，城城佢哋出新車可以慳番筆，但後來林寶堅尼嘅前營業總監EddyWong同馮仁昭講，呢部馬力高達六百六十匹嘅Enzo，係左軚車，喺香港一般係揸唔到出街，馮仁昭相信城城都唔會特登揸返內地，呢部車都係睇多過用，所以根本唔需要畀首次登記稅，所以稅率幾多係冇關係。
而城城噚日就去咗尖沙嘴，出席「第十四屆服務第壹大獎2003頒獎典禮」，重以健身中心代言人身份代表領獎。對於有雜誌指城城不時換新車，搞到要經理人小美倒貼，城城就話：「呢本周刊所講嘅嘢我唔想回應，如果回應只會貶低自己嘅人格。」而小美就透露城城暫時冇買新車，不過就以公司名義買咗部車。
麥家琪同恬妞噚日喺台灣出席劇集《倩女幽魂》宣傳活動，佢哋兩個都着咗性感泳衣，展示出驕人嘅身段。麥家琪一出現，記者嘅焦點都集中喺佢豐滿嘅胸部上，但佢否認自己係34C身材，佢話：「我只是B級。」麥家琪話最唔滿意嘅係自己一對腳，平時佢會跑步減肥。
黎姿噚日喺將軍澳電視廣播城為無綫新劇《鳳舞香羅》開工，佢話呢排為套劇不停咁跳舞，雖然佢本身有跳舞底子，但都跳到屁股同腳好痠痛，佢話：「我呢排一有時間就要去做腳底按摩，返到屋企要浸浴缸，雖然係比較辛苦，但拍出嚟真係好靚，好值得！」
張栢芝前日喺九龍塘拍新片《忘不了》，古天樂客串一日，五點幾就收工。古仔走咗之後，栢芝繼續拍攝，佢不時走近露台試位，只見佢笑容滿面，又舉起雙手，而化妝師幫佢整頭髮時亦表情多多，睇嚟冇因舊愛謝霆鋒同王菲高調拖手而令自己煩惱。
前日馮仁昭爆料話有女歌手拍《1:99》宣傳片收九百九十九元車馬費，嫌錢少唔高興，就向某組織投訴。成段料馮仁昭都冇講明話係邊個歌手同組織，但噚日香港電影工作者總會會長吳思遠竟然對號入座，發聲明話冇呢件事。其實香港有咁多電影組織，加上今次拍抗炎宣傳片牽涉咁多非電影組織，吳思遠竟然代表埋人哋話冇呢件事，馮仁昭覺得幾好笑。
