日本女星安西纊子，近年除咗靠同CHEMISTRY成員男友川畑要嘅緋聞，幫佢製造新聞增加曝光率之外，睇怕佢都冇乜突出嘅新搞作。
我羅拉收到風，好耐都冇出碟嘅安西，原來同avex唱片公司仍然有約，只不過唱片公司唔想蝕大本，所以唔敢再同佢出碟，唔怪之得安西呢排咁鬼得閒，唔係陪男友旅行梳乎，就係做串星出席啲蚊型嘅宣傳活動。佢早排花咗一個月為時裝雜誌拍幾版時裝相，已經算係創舉。
安西早排去咗沖繩成個月，一味周圍買衫、行街同去海灘拍寫真，雖然佢已經獲公認為過氣潮流領導人，但佢仍然對自己嘅眼光同品味充滿自信，重教人三十一個夏日最佳打扮。不過，我羅拉橫睇掂睇，發現佢不離喺比堅尼上加啲點綴同埋玩吓露臍呢兩招。
水着女星出身嘅安西，為咗增加輯相嘅可觀性，點都要重操故業，去到沖繩水清沙幼嘅海灘，喺鏡頭前嚟過性感大解放。佢重話自己好鍾意一代性感女星碧姬芭鐸（BrigitteBardot），更學人哋喺經典情慾片《...AndGodCreatedWoman》入面趴地嘅招牌動作，不過相比碧姬嘅全裸演出，安西真係小巫見大巫。