現年三十歲的葉蘊儀自去年婚姻失敗後，經過一年時間治療情傷，終於走出婚變陰霾，重新做人，而她更決定轉形象，行性感再戰娛樂圈。
葉蘊儀（Gloria）天生一張娃娃臉，當年走清純少女路線，在娛樂圈十分吃香，但十年人事幾番新，自從去年婚姻失敗，Gloria在人生觀上亦有改變，以前的她從不作性感打扮，不過離婚後卻走性感路線再戰娛圈，以全新形象示人。
Gloria日前在銅鑼灣接受本報訪問時說：「我覺得喺唔同嘅年紀要做唔同嘅嘢，以前自己一路長唔大，好似細路女咁，俾外形局限咗，但我離開咗呢個圈咁多年，再次出番嚟，喺人生經歷同性格上都唔同咗，𠵱家出番嚟，我想畀人唔同嘅感覺。」
Gloria表示其實她一直可以接受健康的性感，只是過去沒有人敢讓她作性感打扮，她說：「嗰時我要去日本發展，公司撥咗我係玉女，都冇人會畀我性感，我覺得適量性感無妨，唔好刻意就得啦。」
有一段時間，Gloria因為婚姻挫敗而大受打擊，問她現在是否已走出婚變的陰霾？她即說：「係，之前發生事嘅時候，我覺得一無所有，冇晒將來，好彩我有屋企人支持，又有好好嘅朋友，令我改變咗好多。以前嘅嘢已經冇咗，係一個故事，我希望自己可以有重新起步，其實每樣嘢去到最壞地步時，未必係唔好，最緊要唔好自暴自棄，諗辦法去爬番起身。」
這次Gloria轉行性感路線，未知她有否通知緋聞男友、髮型師Daniel？她聞言即笑道：「佢唔係我男朋友喎，佢係我髮型師同朋友，我唔需要同任何人交代。」問到二人在感情上有否進展？Gloria則說：「我冇時間，太忙啦！」
採訪：朱芷瑩
攝影：甄朝健
化妝：Emma（Booming）
髮型：Andy（Chin.G）
服裝提供：Bella
場地提供：Pasha
