昨日大市繼續調整，已係連跌5日，恒指最低9526，但尾市反彈，上番9606收市，微跌22點，今日結算，若然企喺9600水平埋單，足證大戶「法力無邊」，好淡都食到盡。
午市反彈由地產股帶動，幾隻大藍籌地產股都有多個位進帳。噚日董建華在立法會答問大會上暗示，政府會再有措施穩定樓市，最重要係佢話樓市唔單止要穩定，亦有需要回升，今次係佢自上任同推低樓市以來，首次表明希望樓價要回升嘅立場。坦白講，樓市如果唔好番，香港經濟都幾難復甦。不過，單靠特區政府招數，而冇中央政府幫手，相信都幾難見功；中央政府點幫手？只需一招，就係放寬內地人南下置業的限制，唔使多，一年一兩萬名同胞來港買樓，樓市即刻翻生。
國企股個別發展，中石油（857）創出2.375元新高，基金買盤鍥而不捨，早輪提到QDII話會落實嘅消息，若果真係好快搞掂，則低PE嘅中資同國企股，肯定會畀內地資金搶到飛起。鋼鐵股仍然係馬鋼（323）最吃香，收1.3元，又升2仙，成交逾億股，基金重係收集得好積極。噚日再索料，芬佬話佢哋估計鋼鐵股後市可升5成，馬鋼股價可以「坐二望三」。
電力股一直以來都係基金吸納對象，自山東國電（1071）宣布發展大計後，佢哋又買埋呢隻，不過，呢隻電力股「晒士」較細，所以佢哋都買得好克制，暫時唔敢有大動作，咁樣收集，相信重有一段時日。
山東國電已定下大計，在未來3年，動用400億元擴張資產，目標係到2010年，發電站裝機容量增加3倍至2.3萬兆瓦，亦即現時華能國際（902）「晒士」的兩倍，集團已計劃發行A股集資約20億元，另外亦會發行H股同債券，進行融資。
3隻國企電力股中，基金一直都有揸華能同北京大唐（991），山東國電係最近才加入，但亦以佢PE最低，往績為10倍，而華能及大唐則分別為14倍及13倍，既然山東國電有發展大計，基金揸重佢亦順理成章。山東國電近日股價在2.1元至2.2元間上落，可候機在2.0元水平上車，中線贏面頗大。
郭兆誠