八方噚日去咗紅十字會嘅頒獎典禮，身為會長嘅特首夫人董趙洪娉當然有出席。見董太喺度，八方梗係期待佢有「叠詞」新作啦，好似「捐血、捐血、捐血；幫人、幫人、幫人」咁咪襯番今次頒獎禮主題囉。
點知董太不但冇新作發表，頒完獎之後重雞咁腳走咗，令八方不知幾咁失望。另外一位主禮嘉賓律政司司長梁愛詩，又係好快就走咗喇，真係貴人事忙。
呢個頒獎禮係表揚一啲長期熱心捐血嘅市民。好似其中一位攞獎嘅李先生，佢捐咗二百七十五次血，由十七歲捐到四十八歲，真係唔到你唔佩服。做警察嘅李生就更加厲害，佢話每兩個禮拜就捐一次血，李生嘅精神真係值得表揚，抵佢攞獎！
（圖）李生（左）捐咗二百七十五次血，由十七歲捐到四十八歲，真係犀利！ 黃秋豪攝
傳真︰2623-9278
電郵︰