周星馳拍攝的全新啤酒廣告已經推出，兩位新一代啤妹分別是2R成員黃婉佩（Race）與模特兒MandyLieu，樣子甜美的Race飾演星爺惡妻，而Mandy則扮演惹火的性感女郎，兩人平分秋色。
由周星馳主演的新一輯生力啤廣告「放狗篇」，已於日前推出，繼性感的蔣怡與黃琛如後，第三代啤妺黃婉佩和模特兒Mandy接棒上任。兩美女日前談到能夠與周星馳合作，各有不同的感覺。
於廣告中飾演星爺惡妻的Race說：「我覺得自己好幸運，可以同周生合作，好開心。起初以為個個啤妺都會係好靚，身材好正先做到，但係自己又唔係。我覺得周生同喺戲裏面係好唔同，佢個人好認真，要求好高。」
來自新加坡的Race指今次的廣告拍攝讓她難忘，她說：「今次拍攝一啲都唔辛苦，拍到連天光都唔知。而最好笑嘅係喺廣告裏面我扮到好嬲，連周生都叫我『使唔使咁嬲呀？』」
而廣告中飾演酒吧索女的Mandy，現年只得十八歲，是馬來西亞與美國混血兒，四月來港發展，熱愛藝術表演的Mandy，接拍廣告時並不知道星爺大有來頭。而早前被指是星爺新功夫片的大熱女主角之一，她說：「隨緣啦！其實我接拍呢個廣告時係未知星爺係咁有名㗎，不過見到咁多記者同狗仔隊就知。同星爺合作梗係開心啦！」
採訪：羅慧敏 攝影：仇志德
服裝提供：MissSixty
電單車提供：亞林電單車行
