成功羅致英國球星碧咸的西班牙勁旅皇家馬德里，盛傳將於八月來港獻技，屆時一眾香港球迷便可一睹眾球星的風采。儘管皇馬來港一事尚未落實，但城中已經展開一片撲飛熱潮，譚詠麟、李克勤及許志安等均表示會用盡方法撲飛捧場。
繼英格蘭超級聯賽球隊利物浦下月二十七日來港，於香港大球場與香港代表隊進行友誼賽後，西班牙勁旅皇家馬德里亦盛傳於八月來港獻技。由於皇馬近期成功羅致球星碧咸，故此本港球迷十分關注該球隊會否落實來港，以便及早撲飛，入場一睹眾球星的風采。
身為球迷的譚詠麟，早前其「左麟右李演唱會」掀起撲飛熱潮，現在他要倒過來一嘗撲飛之苦。阿倫說：「我要睇嘅話，就會用盡一切辦法，早排足總內部啲人同我撲『左麟右李』嘅飛，𠵱家就係佢哋還人情嘅時候，我會搵晒我球圈啲朋友幫忙，但如果真係撲唔到嘅話都冇辦法，話晒世界盃嗰陣，我已經睇過啲世界勁旅踢波。」
有傳屆時碧咸未必可以跟皇馬一起來港，但阿倫認為碧咸能否來港，對一班波友影響不大。阿倫說：「我都好鍾意碧咸嘅，但論球技佢仍有待進步，其實皇馬本身有咁多世界級球星喺度，淨係睇佢哋已經夠晒啦！」
除了阿倫外，李克勤與許志安亦已展開撲飛行動，昨日安仔說：「我係皇馬擁躉，到時我都會約埋吳國敬同張衞健去睇波。我都知道好難買飛，但我會有辦法搞掂㗎啦。」而李克勤亦在電話中說：「總之我有辦法撲到飛啦！不過我同阿倫八月中要去外地登台做『左麟右李演唱會』，希望佢哋喺我哋出發前嚟香港啦！」
採訪：戴彩煥、朱芷瑩、馮美茵