老董上次立法會答問大會忽然發火，勁鬧陳偉業膚淺，噚日佢又去立法會，不過成班保皇黨問埋啲九唔搭八問題，直到司徒華開口，八方精神先為之一振。華叔成世人做教書先生，噚日卻扮無知反問老董，上次佢鬧陳偉業膚淺，係咪學前國家主席江澤民鬧記者naive，咁咪係執人口水尾？相信全香港冇人估到華叔問呢個問題，哄堂大笑之後，老董笑笑口話：「唔知你中文好過我，定我英文好過你，naive同膚淺係唔相同喎。」
華叔要求老董解畀佢聽有乜唔同，老董試過叫華叔「放低包袱」，今次學精咗嘞，「教你就唔敢當，天真嘅人就好naive，膚淺嘅人就好膚淺，表面化。」老董答咗等於冇答，但華叔都收貨費事再同佢糾纏。
專欄作家古德明指出，naive除可譯作無知innocent，亦有「天真」嘅意思，但卻帶有貶意，而膚淺亦係一個有明顯貶意嘅用詞，佢認為董建華基本上冇混淆naive與膚淺嘅意義，但就亦冇答到司徒華嘅問題。
老董噚日冇乜蝦碌，但就有個搞笑場面，事關只有三司八局官員捧佢場，三個近期大熱高官孫明揚、王永平同楊永強都唔在場，偏偏議員總係追住呢三個高官負責政策範疇嚟問，老董左望右望都唔見人，其他議員都忍唔全笑出聲。
傳真︰2623-9278
電郵︰