橫掃全球票房嘅MARVEL超級英雄《變形俠醫》，例牌咁借勢推出跨平台電子遊戲，PS2、XBOX、GAMECUBE甚至連PC版都有，遊戲玩法簡單，邊行邊走消滅敵人，最正係周街攞嘢攻擊，狂暴起嚟重可以跳起踩人，甚至連車都踩得爛，相信有冇躁狂病都玩得好High。
記者：徐影龍
遊戲同電影一樣，《變形俠醫》緊貼《EntertheMatrix》推出，機迷難免有所比較。由於故事性先天不及《Matrix》咁浩大及複雜，故《變》遊戲劇情並非跟足原著，以主線大橋再另行加插劇情及敵人，不及《Matrix》遊戲及電影關係咁密切。開發公司將心思花喺遊戲性及動作方面，真實背景下，人物以另類手法表達，採用一種偏近卡通式嘅貼圖，光影效果更為突出，尤其昏暗環境下好有壓逼感同氣氛，呢點值得一讚。
遊戲基本上以爽快殺敵為賣點，一開始，已經講主角Bruce喺無意識狀態下，以綠色巨人跟軍方大戰一場。筆者玩XBOX版時，見人就「冧」見車就踩，重特登扭大重低音，享受嗰種「嘭嘭」聲嘅破壞快感，當發洩兼減壓絕對一流。
《變》遊戲版故事冇睇頭，幸好遊戲性及動作彌補唔少分數。綠色巨人破壞力驚人，亦設定好多物件供玩家大肆蹂躪，所有地上物件如燈柱、油箱甚至大大架汽車等，都可隨手執起作武器，冇嘢執時索性跳起踩扁敵人，相當之搞笑。除一般打鬥外，每當綠色巨人受到一定程度攻擊後，憤怒計爆滿後會進入狂暴狀態，呢個時候攻擊力會大幅增加，兩三下手腳就搞掂嘍囉，最啱對付首領級敵人。睇番行版中文說明書，發覺Hulk唔同狀態下，加埋居然有成五十幾招，拍住《劍魂》一類嘅3D格鬥Game，為遊戲增添不少動作元素。
電影公司為推高聲勢，提供PC試玩版下載外，重同綠色飲品MountamDew合作，大玩《變形俠醫》ScreenSaver同Wallpaper，有齊PC及Mac版本，全部免費供下載。
兩大張Wallpaper，解像度夠高，Print出嚟欣賞都得，問題係大大隻飲品牌子喺度，吸引力大減。
Desktop飾物下載：
多款相片及過場特效畀你揀，之後網頁自動轉為ScreenSaver檔案畀你下載。
趣味小玩意，以左、右掣作揮拳，將自己個Desktop一拳拳咁打爆，變態人士適宜扭大音量玩。
收錄開頭大戰軍方坦克一段，內容唔算長，勝在有多段Movie及感受綠色巨人嘅狂暴攻擊。試玩版容量166MB，寬頻先好考慮Download。
試玩版下載網址：
gumclik.html?id=518&p=5
遊戲類型：動作
對應機種：
XBOX
PS2
GABECUBE
Windows
遊玩人數：1人
開發商：Radical
今次香港XBOX預留多款精美《變形俠醫》印刷品畀《蘋果》讀者，包括25張電影大海報、25張遊戲海報及50張明信片等，只要手持今日本版，到灣仔東方188嘅DreamStore，就可免費獲得其中一款，想攞啱心水就要早啲喇，數量有限，送完即止。
DreamStore
地址：灣仔東方188商場二樓256號舖
電話：25753285