電影界前幾日話要七一上街遊行，董建華即刻走出嚟話，CEPA可安排港產片不受配額限制打入中國市場，向電影界獻媚。
原來一話上街，阿董就會出招收買人心，睇嚟認購盈富基金（2800）嘅蟹民、八萬五負資產一族、同埋二十多萬失業大軍都應該出聲話七一會上街，到時阿董可能再動用1200億元掃高港股，或者叫中央北水南調掃起香港樓市，到時樓股齊升，失業率自然下降，呢個當然係阿虎好天真或者好膚淺嘅想法。不過，阿董就算想慷納稅人之慨，大灑金錢收買人心，但香港庫房亦冇咁嘅能力。
港股噚日繼續跌，一度逼近9500，收報9605，跌22點，成交69.28億元。港府話再諗計救樓市，地產股大反彈，新地（016）倒升1.27%；恒地（012）更倒升2.7%。電影股亦有理冇理升咗先算，中國星（326）勁升21.7%，收0.56元；嘉禾（1132）升5.2%，收0.305元。不過，寰宇國際（1046）就真係大整蠱，早段升完10%，即刻被壓返落去，全日倒跌21%，收0.15元。
偉易達（303）實際業績唔算太理想，早段股價冇乜大變動，點知午後竟有大盤掃貨，大升逾16%，收報6.75元，成交逾1.03億元。據聞，有歐資睇好偉易達前景復甦，入市增持。由於唔知歐資增持行動完成未，所以好難話重有冇得炒。
華智控股（8065）首日上市係威係勢，但噚日開始腳軟，平收0.375元，成交萎縮至1357萬元，唔通真係俾阿虎講中，好快冇料到？
高寶綠色（274）停牌咁耐，傳出唔少消息，除咗話要澄清稅務優惠外，又話可能有外資入股，另外又傳收購藥業，不過有人話好快會復牌。
阿虎