剛推出嘅PS2遊戲《頭文字DSpeicalStage》，食正街機條水自然激爆啦！雖然遊戲連軚盤成千一蚊先有交易，但係捧場客依然絡驛不絕，𠵱家單遊戲市價約$340左右，而軚盤則$700左右，《三國志戰記2》則有行貨中文包裝（唔係中文版）推出，市價約$390-$410，《半熟英雄vs3D》則$400-$410。被遺忘咗嘅PS亦有新遊戲，今次主角係動漫大熱嘅《狐忍》，追開漫畫嘅不妨留意，市價約$280左右。
日本同香港延期至7月17日發售嘅《R-TypeFinal》，早前已經推出咗韓國版，而且足足比日本早咗成一個月，咁亦證明近年無盜版嘅韓國市場喺遊戲廠商心目中，佔有非常重要嘅地位同有利可圖，希望香港有朝一日亦會同樣被廠商重視。
CAPCOM剛推出嘅GC橫向動作遊戲《ViewtifulJoe》，美式漫畫風格有型兼過癮，所以叫好又叫座，坊間去貨都好快，側聞代理亦已售清存貨，有興趣好快手入市，市價現約$350左右。GC連GBPlayer嘅套裝機亦已有售，市價約$1,350左右。
XBOX嘅《DinoCrisis3》星期一已經喺各大場出沒，雖然同PS2今個星期咁多重頭對碰，但係銷情依然唔錯，相信係同今集遊戲質素唔錯有關，質素高始終會有人捧場，市價約售$360-$380。