哈利波特最新一集小說「鳳凰密令」風靡全球，好多人排隊都未必買到。本書嘅魔力真係唔細，估唔到咁啱同時畀兩個發展商睇中，除咗永泰亞洲送呢本書畀睇樓客外，噚日太古馬淑貞都話，佢哋都訂咗超過兩百本，今日公布送畀將軍澳維景灣畔嘅買家同記者，可惜俾人捷足先登攞咗頭彩。
維景灣畔今日會出新聞稿公布詳情，對個盤有興趣，又想要哈利波特小說嘅市民要留意嘞。
另外，太古計劃第三季推出嘅鰂魚涌逸樺園，噚日開始喺太古城中心搞展覽。最特別嘅，就係介紹埋太古喺港島東區嘅發展歷史，其中一張重係鰂魚涌太古坊前身，一八八四年太古糖廠嘅面貌，好有紀念價值。
馬淑貞話，到八九月左右，就可以開放逸樺園現樓示範單位，準備開賣。
發展商重舉辦「思想‧家」相片蒐集比賽，勝出可獲商場簽帳額。
中區巨無霸商廈國際金融中心二期就快入得伙，聽講發展商之一嘅新地，計劃請新地會會員，喺七月份兩場參觀，但係要先畀一百蚊定金，抽唔到嘅，或者睇完樓之後都有得攞番，又或者捐畀公益金都得。
不過，若果抽到唔去睇，發展商就會沒收呢一百蚊，且捐畀公益金。
發展商請睇樓竟然搞到咁複雜，可能係想搵出嗰啲真係有心睇樓嘅會員，咁向佢哋sell個盤，成功機會都大啲！
國金二期𠵱家有幾個大業主有樓面出租，新地唔諗吓辦法又點得呢。
世界衞生組織啱啱解除北京嘅旅遊警告，同剔出非典疫區名單，高力國際就即刻出咗份北京房地產市道報告，指出喺五月疫症肆虐期間，唔少大型跨國機構，都將搬遷同擴充計劃擱置或者推遲。有啲設喺北京嘅分公司重關門大吉，同安排員工撤離。
報告又話，豪宅租務一個月內大跌七成，租金跌兩三個巴仙，五月底每呎月租只係十五個七。
不過，報告結尾就話，租金已經見底，市場對豪宅嘅查詢多番，估計未來半年，市場需求以短租酒店同服務式住宅為主。
𠵱家樓價重未止跌，業主想賣樓就要劈價，好似大埔居屋頌雅苑，最近出現咗一個新低成交價，僅三十三萬。
聽美聯大埔區域經理徐永成講，原來個業主等錢使，所以將叫價由市價四十五萬，劈到落三十三萬，唔使一個禮拜就賣出咗。呢個C座中層單位，面積五百五十九呎，即係平均每呎五百九十蚊，真係深圳價都不如。
個買家係綠表客，聽講係用政府四年每個月劃一津貼嘅資助計劃入市，只要供款年期短啲，就可以用盡政府嘅資助，認真好數口。
發展商賣貨尾，好多時都會搞優惠促銷，一時送呢樣，一時送嗰樣，幾乎個個禮拜都有着數畀買家，但始終唔會直接減樓價。點解呢？
行內人士解釋，不斷有新優惠，買家至會對樓盤有新鮮感，代理先有話題可以sell客。
唔講唔知，原來有時貨尾盤除咗一兩個單位係筍價外，其他單位分分鐘加咗價都冇人知。各位買家第日買樓前要多啲留意吓嘞。
蘭西
電郵地址：
