樂壇招積仔還擊馬圈牙擦蘇
霆鋒叫簡炳墀：拖好隻馬先

在娛樂圈有最反叛藝人之稱的謝霆鋒，前晚得悉馬圈最牙擦的練馬師簡炳墀指他拖王菲手博宣傳後，即反譏對方借他宣傳，霆鋒說：「又關佢事？拖好佢隻馬先啦！」簡炳墀昨日聞言指霆鋒不能接受批評。

有「牙擦練馬師」之稱的簡炳墀日前在《千機變》首映上，指謝霆鋒在北京高調地與王菲拖手是博宣傳，前晚霆鋒得悉後看來相當不悅兼還以顏色，叫簡炳墀「拖好自己隻馬」。簡炳墀昨日在電話中聞言大笑，聲稱並不認識謝霆鋒和王菲，又勸霆鋒要接受別人批評。娛樂圈最反叛藝人與馬圈最牙擦練馬師正式開火。

「無厘頭過份咗」
霆鋒前晚與Twins、鄭希怡和吳浩康等在大學會堂，演出新城主辦的「頭號人物唱好音樂會」，霆鋒接受訪問時得悉簡炳墀指他與王菲拖手是博宣傳，又指他沒有實力顯得甚不開心，他起初反問說：「吓？簡炳墀？邊個嚟㗎？」其後他又說：「又關佢事？我冇回應，唔好意思，拖好佢隻馬先啦！」
問霆鋒是否覺得受傷害？他說：「冇，大家唔同圈子，一個娛樂圈，一個馬圈，借宣傳嗰個未必係我。」問他會否沉不住氣，霆鋒說：「唔知，有時人哋批評咪自己先去反省，不過太過無厘頭，好似頭先單嘢咁（指簡炳墀批評），我都唔知乜嘢事，就過份咗少少。」
對於有報道指他借王菲博反彈，霆鋒表示絕不介意，也不用平反，他說：「讀者應該有分析能力，唔使我講。」

「退咗休都冇馬」
而簡炳墀昨日在電話中，獲悉霆鋒反指他博宣傳後大笑說：「佢唔識我咪算數囉，咁係宣傳伎倆嚟，我贏過五屆冠軍，第一個攞終身成就獎，唔使借佢宣傳啦，話我乜就乜囉。」
對於霆鋒叫他「拖好自己隻馬」，簡炳墀說：「我退咗休，都冇馬。」問簡炳墀有沒有見過霆鋒或王菲，可覺得二人合襯？簡炳墀說：「我冇聽過佢唱歌，歌星藝人我只係識譚詠麟、曾志偉嗰啲，王菲我都唔識得，兩個都冇見過，對做戲唱歌嘅人我唔熟，我都唔睇戲。」

「接受人批評吓啦」
說罷簡炳墀想一想後大笑說：「佢（指霆鋒）咁都嬲呀？我成日同四哥打波㗎，你有冇打畀佢老竇呀？」問簡炳墀為何要打電話給謝賢，他說：「問吓佢，佢老友批評佢個仔呀，我都唔係批評啦，講事實啫，係宣傳伎倆呀，接受人批評啦。」