碧咸去日本，喺成田機場造成轟動，日本fans嗌到幾乎暈低。跟住上星期日碧咸兩公婆靜靜雞去咗泰國，事前保密工夫做到十足，只得好少人知道，據講步出機場就上咗車，去距離曼谷以南二百公里嘅一個度假地點；左丁山靠估之下，認為碧咸夫婦係去咗華欣（HuaHin），當地有一個世界聞名嘅Spa專門酒店，美麗沙灘，清靜環境，兩公婆度假休息，嗰度最啱。
碧咸喺亞洲極受歡迎，加入皇家馬德里之後，皇馬肯定係地球上最有吸引力嘅球會。香港沙士疫症之後，好需要吸引全世界注意，有乜好得過成為全球第一個邀請皇馬訪問嘅地方？歐洲聯賽之中，西班牙開鑼最遲，九月初嚟香港踢表演賽，與中國國家隊為對手，應該有得斟者，皇馬表演費聽講要三四千萬港紙，中國隊就要番啲零頭（譬如兩三百萬）就得啦。大球場坐滿有三萬八千八，門票平均售一千蚊一張就可以打和。大把日本女球迷會專程飛嚟香港睇碧咸，球票銷路絕無問題。
政府預咗十億元宣傳香港，有乜招數好過請齊皇馬啲球星來港咁有宣傳魅力？碧咸、施丹第一次在亞洲同場上陣，全世界電視轉播費已經收番唔少啦，政府津貼三四千萬元，抵到爛。有關部門唔好細眉細眼搞細騷嘞，立即與皇馬斟吓，是為上策。