困擾咗拉素好耐嘅財困問題，隨住佢哋前日得到過億歐元借貸，暫時告一段落。不過呢個利好消息一出，拉素即刻一口氣由烏甸尼斯引入三個球員，之後又繼續傳緊佢哋想買呢個買嗰個。我求大俠奉勸佢哋啱啱步出鬼門關，都係小心用錢至好，否則打回原形就唔好啦。
據報講，拉素將會用卡斯度文同埋利華蘭尼，再加幾百萬歐元換烏甸尼斯嘅佐真遜同埋比沙路，另又借埋人哋嘅艾拔圖。咁多動作，當然係想增加本錢爭來屆聯賽同埋歐冠盃。
佢哋教練文仙尼有料係人都知，至怕啲高層有餘錢就身痕，亂咁買人。點都好，今次雨過天青，最開心肯定係班球員，聽講會方唔單止會還晒欠薪畀佢哋，有部份重會加人工㖭，總算飲得杯落。
我求大俠有睇噚日朝自由盃網上直播，睇見山度士下半場有唔少餐士，而輸第二球波更加無厘頭，淨吞小保加兩蛋又真係有啲唔抵。點都好，輸係輸咗，估唔到山度士教練李奧賽後狂踩對手，話人哋一味靠運，未遇過咁夠運嘅對手喎，咁講又似乎無咩風度。
新一季英超將會響八月十六日開鑼，當日早場由升班馬樸茨茅夫主場對維拉。樸隊主席文達歷知道呢個安排後好興奮，話只要贏波，起碼可以過幾個鐘頭榜首癮。咁樣諗好似阿Q，但對於成季都未必做到一哥嘅球隊，又真係幾難得嘅。
車路士後衞加拿斯早排鬧離隊，事隔幾日，佢經理人就話佢將於短期內同會方續約四年。梗係啦，加拿斯又當打又夠食力，無近一千萬鎊都唔使旨意「車仔」放人，試問𠵱家時勢有幾多隊出得起呢個價買後衞？最着數都係加拿斯，跳跳草裙舞就可以續約加薪，真係叻仔。
利華古遜下季無得打歐洲賽，財政前景唔樂觀，主力星散。施夫高域就已經去咗樸茨茅夫，嚟緊爾迪雷及盧斯奧都會被賣走。遲啲唔知會唔會唔幫剛剛簽入嘅盧錫做新球衣，搵盧斯奧嘅舊波衫畀佢就算呢？事關兩人英文名只相差一個字母，將盧斯奧個「O」字搣走一邊變成個「C」字就得啦！
前晚三場梳打埠有開盤賽事，賭友似乎可以報番之前一輪北歐聯賽係咁開下盤，畀莊家大勝之仇。瑞超咸史泰斯由平手盤畀人捧到讓平/半照贏，其餘兩場自由盃及美國大聯盟，亦係有顯著落飛嗰邊贏盤，呢局算係賭友大勝。睇嚟大家都開始逐漸對呢幾瓣比較陌生嘅賽事有所掌握，莊家以後開盤就頭痕囉！