大市噚日冇厘神氣，前日掛牌的華智控股（8065）同華園（2349）亦由熱鬧歸於平淡，前者守住0.375元，冇升跌，後者只係頂咗一日，噚日已經跌穿0.85元招股價，收0.82元，短期走勢唔樂觀。
不過，今日又有3隻新股掛牌，就係百富國際（8172）、聯華超市（980）同埋味丹國際（2317），睇怕市況亦唔會太悶。
百富屬於私人派對，如果唔係圍內人，例如小初之流，基本上可以當佢冇到。至於聯華同味丹，招股時已聞到炒味，尤其係後者超購156倍，夠晒聲勢。小初一班經紀老友，非常憧憬台灣幫主理嘅味丹，會一如以往大炒特炒。小初就比較保守，睇埋走勢如何，先至決定落唔落場短炒。
除咗新股之外，經紀黃叫小初得閒留意一吓維他奶（345），佢話隻股將於7月9日公布全年業績，估計有藉口炒一轉。
查實維他奶去年12月公布中期業績，盈利勁升7成，如無意外，全年表現應該十分理想。
慕容小初