恒指微跌，H股則出色，華能（902）最醒，收8.70元，有40仙進帳，唔覺唔覺又逼近歷史新高。窩輪龍虎榜上，自然唔少得華能Call輪，市場5隻Call輪，4隻上榜，升幅由15%至29%。
排頭位嘅係9738，由1.36元彈上1.75元，兩個月後到期，溢價0.6%，槓桿率5倍，冇乜成交，全日得12萬份易手。華能Call輪，除咗遠期嗰隻9872，溢價普遍好低，對正股反應好直接，幾乎按槓桿率變化。正股累積升幅唔細，高價追輪未必着數，要買嘅話都係等正股回落先至考慮。
地產股繼續有壓力，大隻地產股除咗新世界（017）冇郁之外，隻隻低過上日，不過跌勢已放緩，似乎已抵超賣地步，可以博吓反彈。
新地Call輪可以吼吓9799，10月到期，現價26仙，溢價8.4%，槓桿率15.1倍。恒地Call輪吼9787，明年2月到期，現價28.5仙，溢價6.9%，槓桿率7.8倍。長實Call輪始終吼9764同9829兩件。
電盈（008）升1格，收4.95元，但隻大成交嘅Call輪9662由3.9仙跌落3.5仙，始終溢價好高，日子一日一日過，溢價一日一日縮。睇好正股博反彈，直接揸正股比較實際，或者揸溢價較低嘅Call輪9762。
章盛