鄭秀文（Sammi）與古天樂戀情愈炒愈熱，上周兩人到日本拍《戀上你的床》，有雜誌報道這對緋聞情侶在日本共度良宵，昨日Sammi的經理人郭啟華表示該雜誌是把當晚拍戲的情況誤當偷情證據。
鄭秀文（Sammi）與古天樂這對緋聞男女上周到日本拍陳慶嘉導演的《戀上你的床》，《東方新地》昨日大字標題指他們在日本同房過夜。前晚兩位當事人由日本回港，卻刻意分閘出來，而且對緋聞不肯作任何回應，但Sammi的經理人郭啟華與《戀》片監製錢小蕙同時炮轟該周刊偷拍了古仔與Sammi的拍戲情況當偷情，認真離譜。
郭啟華昨日接受電話訪問說：「我覺得呢本雜誌完全係看圖作文，根本嗰晚古仔、Sammi連吳君如同梁家輝都喺房拍戲，拍攝現場喺二樓，我哋全部人就住喺十樓，古仔同Sammi着嘅日本和服睡袍係戲服，拍完戲要即刻還番畀酒店。雜誌可以寫成咁，好彩Sammi心情冇受影響。」
而錢小蕙在電話中亦勞氣說：「為咗還佢兩個人公道，證明雜誌影嘅只係拍戲現場，今日（即昨日）我哋會向傳媒發出當晚嘅劇照，佢兩個所着嘅睡衣，其實係戲服嚟。我都唔想佢兩個主角誤會係電影公司搞宣傳，所以我覺得有責任澄清，唔想佢哋俾雜誌夾硬砌。」
另外，古仔昨日下午乘車到九龍塘一單位客串演出爾冬陞執導、張栢芝主演的《忘不了》，古仔被追問緋聞時，他說：「冇回應。」不過他的心情很靚，在露台與小孩玩耍，後來栢芝步出天台給記者拍照，古仔原想搭柏芝膊頭影相，怎料栢芝立刻縮入屋內，十分搞笑。
而Sammi昨日約三點乘車到中區麥當奴道與劉德華為政府拍清潔香港宣傳短片，當記者追問她是否與古仔在日本度春宵時，她並未有回應，且匆匆進入室內避記者的連番追問。
梁漢文和吳國敬昨日接受港台訪問時，對於Sammi被指跟古仔同房一事，梁漢文說：「入去作曲咋？又或者係排戲呢！」吳國敬則說：「恭喜佢，一句講晒，係咪開心，唔係咪造謠囉！」
採訪：娛樂突發組、何永寧、汪正文、楊潔雯
