風靡全球的小說哈利波特，最新一集「鳳凰密令」掀起搶購潮，香港都唔例外，推出冇耐已經賣斷市。但𠵱家可以唔使錢就有得攞，原來永泰亞洲喺月初已經預計到呢本小說會好搶手，所以向書商訂咗一批貨。今個禮拜日會喺九龍塘陶源現樓送畀睇樓人士，頭腦果然轉得快。
聽永泰亞洲李簡鳳玲話，家長只須帶埋仔女一齊參觀陶源，之後答啱一個問題，就可以獲贈呢本咁搶手嘅小說，手快有手慢冇。佢哋重列咗幾條問題畀大家參考，好似「講出霍格華茲四個學院其中一個」、「哈利波特最要好朋友是誰」等。全部都係小說第一至四集嘅內容。
近排興起讀書熱，陶源又坐落喺名校網四十一校網，送小說就最啱啦！陶源嘅英文名係「Bloomsville」，而呢本書係由「Bloomsbury」出版嘅，嗰名都好相似，唔怪得永泰會用嚟做贈品啦。
講番陶源，李太話，十個出租單位已全數租出，𠵱家只得十五個單位可供出售，呎價介乎四千至五千五百蚊，今次推出重售，原因係近排五六百萬嘅豪宅買賣活躍咗。
7月1日香港回歸六周年，市面會有好多慶祝活動，商場要吸引消費者，就要各出奇謀。
地鐵旗下四個商場會搞「慶回歸每小時狂熱大抽獎」活動，由下晝兩點到九點，每個鐘抽獎一次，總共八次，只要消費滿二百蚊就可以參加。獎品包括千足純金、電器同購物禮券等。
喺1號到26號重有一個「精挑細選生活科技月」嘅推廣活動，用震撼價傾銷各式電腦、音響同數碼相機等產品。另外重會搞「精挑細選生活科技勁獎大激賞」，參加辦法同慶回歸抽獎相同，但要到7月底先至抽獎，喺「慶回歸每小時狂熱大抽獎」落選嘅獎券，都可以參加呢個抽獎，獎品有等離子電視、按摩椅同家庭影院等。
近排記者招待會多到做唔切，恒基嘅旺角百利達廣場今日都有記招，發展商就嚟一個別開生面嘅安排，冇講地點。
莫非唔想記者去採訪？非也，因為佢哋已安排好專車接載大家，地點重有兩個，一個喺油麻地，一個喺天后，究竟點解會咁做，今日會有答案。
發展商今日重會公布樓盤嘅開售詳情。
元朗YOHOTown吹風吹咗咁耐，賣樓部署行動終於進入大直路，地產代理都要設立「基地」作戰。噚日利嘉閣位於新元朗中心售樓處附近嘅YOHOTown情報站搶先開幕。不過，佢哋原先諗住今日至開舖，為咗遷就發展商新地開放示範單位，於是提早一日開。
利嘉閣執行董事廖偉強話，特登喺旗下嘅經紀中，揀咗五十個精英擔任宣傳大使，專責派傳單同埋介紹樓盤工作。
隨着疫潮減退，靜咗一排嘅樓市又生猛番。大型新盤排住隊推出，發展商賣樓要員，自然要四出觀摩，知己知彼。
剛剛升咗職嘅新世界發展何太（何伍燕榆），噚日中午去完和記大廈開會，剛巧經過長實映灣園二期示範單位，就順道造訪一吓。佢話平時通常避開發展商開緊盤嘅時候去參觀，怕阻住行家，噚日咁啱經過，順便睇吓。
佢參觀完之後，大讚映灣園二期映濤軒個示範單位做得靚。咁啱佢哋喺東涌又賣緊海堤灣畔，會唔會作相應部署迎戰映濤軒，何太話要睇吓情況至決定。
除咗何太，電盈顏金施噚日都去咗荃灣嘅朗逸峯參觀，嘉華地產嘅方俊同長實黃思聰不忘熱情招呼一番。
蘭西
電郵地址：
