張國榮（哥哥）跳樓自殺之後，留低咗億幾身家，聽講佢生前已經立咗遺囑，而份遺囑重修改過兩次，佢係希望所有阿哥、家姐同外甥仔女都可以分享到遺產。
除咗佢嘅摯愛唐鶴德分得最大份之外，聽聞佢嘅大外甥女都分到一筆好可觀嘅遺產，而且數目係比佢嗰幾個阿哥同家姐分得重要多，因為哥哥上年知道自己有抑鬱症之後，佢個外甥女好乖，成日帶埋個男友去陪哥哥呢個舅父，所以哥哥好錫呢個外甥女。
雖然哥哥生前同啲親人唔係話聯絡得好緊密，只係同大家姐張綠萍嘅家人比較多來往，但佢立遺囑都有照顧埋其他至親，佢都算有情有義。聽聞佢啲阿姐同阿哥，個個差唔多可以分到有接近八位數字嘅遺產。
張文慈噚日真空上陣，着咗件低胸露背裙出席喺香港仔舉行的「美國純美健與美締造中心」開幕活動。雖然佢真空上陣，但係就冇做防走光措施，佢話：「因為條裙個胸邊黐膠紙唔靚，所以只係貼上胸貼，冇諗過派禮物時啲人會埋身搶，我唔係驚俾人拉衫搞到走光，反而係驚阿婆會仆親。」
今次佢做健康纖體產品嘅代言人，為期兩年，酬勞接近七位數字，佢重話比之前多咗好多㖭。佢話：「大家合作咗三、四年，今次酬金係之前嘅十倍，當然我付出嘅亦都多咗。」
有報道指張同祖因工作關係去唔到七．一遊行，噚日張同祖話：「我係一定會去七月一日嘅大遊行，當日我同導演會部份導演、編劇會部份編劇都會約埋一齊去，大家都係以個人名義去。我一向都反對二十三條，呢條法例對電影創作會有影響，所以我要出席今次遊行。」
鄭伊健前晚喺銅鑼灣出席《千機變》首映時，以一頭短髮亮相，佢話自己已經有成十年冇剪短髮，今次都係為咗拍戲先。
