一直對教學工作孜孜不倦的黃耀棠，當了20年教師卻突然放下教鞭，經營了一間越南菜館，還當起食店的總廚來。多年來親力親為打理食店生意，為的只希望顧客能真正享受到高級但便宜的越南菜式，讓食客知道怎樣才稱得上正宗越南菜，98蚊兩隻新鮮咖喱膏蟹就是最佳例子。
記者：何善華
攝影：陳偉強
集「老闆」及「教師」於一身的黃耀棠經常以「老師」自居，食店的職員亦以「老師」稱呼他。「老師」表示，自己過了多年教師生涯，覺得係時候轉變，適逢舊東主讓出舖位給他，於是「老師」的起心肝於兩個月內跟從師傅學習烹調正宗越南菜嘅手法，更在1985年開始擔任食店嘅總廚。「老師」自豪地表示，有錢一定可以做老闆，但未必可以做到一個咁有料嘅廚師。
「這裏的咖喱膏蟹包保全部由新鮮蟹製成，咖喱醬亦係自己秘製嘅，食客品嘗過後肯定會念念不忘，回味無窮。兩隻膏蟹賣98蚊絕不取巧，但其實已經有賺，總不明白有些食店要賣200幾蚊一隻咁貴！」「老師」不諱言好味嘅膏蟹不只他這一間，但認真去搵就一定唔容易。
為了吸引更多食客光顧，「老師」在土瓜灣多處街道上擺放了一塊惹人注目的螢光黃宣傳紙板，往往能吸引好奇食客進內一試。
每隻重量達1斤的越南頂角膏蟹，配以「老師」用越南香料獨家秘製嘅咖喱汁，無油之餘又香又新鮮，係食店嘅鎮店之寶。就算食店環境較「噏耷」，仍然有一批識食之人繼續捧場。
無味精嘅牛肉湯河，牛肉片片薄切，夠滑夠爽，加上無落味精嘅一等上湯，每碗賣十零蚊真係平到笑。
「老師」醃香茅雞翼堅持用新鮮香茅，捨棄了坊間食肆多採用的香茅粉，令食客品嘗更能感覺到陣陣香茅嘅濃味，份量十足。
一碟炒飯賣$48都話平！無錯，「老師」話以他別號命名的炒飯，烹法講究且頗考功夫，掌握火候要恰到好處，上桌時少了平時食炒飯的油撈味，蛋味四溢，炒飯粒粒甘香且乾身，品嘗時更覺煙韌彈牙。出面食起碼要100蚊㗎！
南方越南菜館
地址：土瓜灣銀漢街21A後座地下
電話：23620910
營業時間：12:00nn-2:30pm,6:30pm-3:00am