金融界嘅劉氏宗親，流年不利。中銀香港嘅劉金寶，位高權重，一夜之間被召回北京，動彈不得。台灣嘅前國民黨掌櫃劉泰英，曾權傾一時，今亦成為階下囚，要動用大量現金保釋出外受查。
左丁山冇資格與劉金寶親近，對劉泰英知得重多一啲。劉泰英受李登輝重用之時，手上掌握過千億台幣資金，可以講得話呼風喚雨。姑勿論佢有冇貪污瀆職，以權謀私，佢在位之時，親自批准國民黨以至政府資金到美國投資生物科技公司、生物科技基金，就已經說明佢好有長遠目光，非一般官僚可比。佢下台之後，據矽谷一啲消息講：「唉，劉博士點都係做事之人，後來者只識一個錢字。」
劉泰英係台大經濟系五十年代嘅畢業生，當時台灣好窮，劉泰英窮到冇鞋着，唔夠飯食。一位教授憐才，畀錢佢買鞋，久唔久請佢返屋企食餐飯。教授萬萬料不到，劉泰英後來會發得咁緊要。
劉泰英喺台大做經濟學教授之時，已年年到老教授恩師府上拜年，到佢大紅大紫之日，老教授已經魂歸天國，一般人就會思情已盡。但台灣朋友話，劉泰英仍繼續到老教授故居，向老師母拜年請安，令老師母好感動。
如此人物，一朝落難，自然有好多人打落水狗，但劉泰英若無李登輝庇護，點敢做咁多嘢呀？總之中國官場，好講保家實力，保家不在，家臣就有難咯，北京如此，台北何嘗不然。