寫字樓買賣開始增加，近期接連出售手上物業嘅均來集團，都趁機會賣咗尖沙嘴力寶太陽廣場嘅單位，造價唔錯。
均來持有嘅九樓十六室，三千二百五十四方呎，以八百三十幾萬成交，每呎近二千六百蚊。單位現由美資公司租用，呎租十五個半，計落回報率超過七厘，租期到○五年初。
中原地產商業部助理營業董事陳玉雲話，均來喺五月底嘅時候表示過二千四百蚊呎都肯賣，點知就收到唔少投資者問盤，終於以近二千六蚊呎成交。不過，因為均來係喺九五年用每方呎七千一百蚊買入，所以要蝕六成幾，都咪話唔傷。陳玉雲又話，香港除去疫區之名後，商廈投資氣氛即時轉好。
均來集團或有關人士近月先後賣咗幾個物業，除咗英國嘅商舖外，董事總經理戴志華就以八百二十萬賣咗西貢洋房，而大潭紅山半島獨立屋就賣咗一千九百五十萬蚊。
政府喺七月一日請市民食飯睇戲，送出1萬張戲飛，英皇地產陳志凌有樣學樣，噚日喺舂坎角御濤灣嘅記者會上，大派集團出錢拍嘅新戲「千機變」戲飛。
呢套戲噚晚先至搞首映禮，相信大部份記者遲啲都會去捧場。陳生真係識計數，介紹樓盤之餘，重幫公司拍嘅戲賣廣告做宣傳，一舉兩得。
講番御濤灣個盤，成間屋最特別嘅地方，係主人房浴室入面有部入牆電視，位置對正浴缸、企缸同埋座廁，無論喺入面做緊乜，雙眼都可以黏實部電視，啱晒超級電視迷。
今年上半年有唔少全幢商廈成交，最大銀碼係上環維德廣場，買家係外資基金大摩，作價八億四千幾萬。至於最新賣出嘅中環辰達集團大廈，價值一億零八百萬。
辰達集團大廈高二十三層，總樓面五萬八千五百方呎，每呎一千八百四十六蚊。呢兩宗大手交易都係由仲量聯行促成，投資部主管盧慶雄話，非典型肺炎疫情後，投資氣氛改善，市場即時錄到唔少投資者入市個案。佢哋好多係趁利率跌至低位時入市，至於辰達嘅買家，都係投資者，買嚟收租。
深圳皇御商城喺五月下旬接受認購，𠵱家已經收到近一百個登記，今個禮拜六開賣，每方呎二千四百一十五蚊人民幣。聽代理置業國際講，原來八成認購嘅買家都係投資者；而認購買家中，兩成係港客。個盤共有一百三十九個舖位，面積一百多呎至四百三十一方呎，今年底可以交舖。
發展商皇城地產話，皇崗口岸一帶嘅商舖多數都係唔賣嘅，所以租金一直穩定上升，𠵱家每方呎租金係十一至十四蚊，佢估計皇御商城嘅舖位租金，兩年後有機會升到三十三蚊，回報率超過十四厘，原因係皇崗口岸全日通關，佢個商場獲准通宵營業。
下個禮拜二七月一號係回歸紀念日公眾假期，適逢全城矚目嘅反23條大遊行日子，聽講好多機構都會有員工參加遊行，包括一啲同中資關係密切嘅公司。
蘭西聽聞，有啲地產公司職員都會參加遊行，不過部份強調係個人決定，有啲就話會低調咁參加，可能係唔想老細知道啩。
蘭西
電郵地址：
