港股連續大跌兩日，恒指就落到9600水平，大戶計過喺呢個位結算最着數，今次應可如願以償。
藍籌有沽壓，國企個勢重係好強，成交15.8億，佔大市總成交17.6%，基金同大戶明顯仍在收集。鋼鐵股中以重鋼（1053）最勁，由低位1.56元反彈上1.65元收市，屹立不倒。中石油（857）俾股神睇中之後，股價升勢清風送爽，到呢兩日先唞一唞氣，但噚日收2.225元，逆市而升一個位。芬佬話除鋼鐵同石化股外，呢隻大國企中石油亦係必選對象，下一個升浪，最少可見2.5元。
宜進利（304）明日派成績表，噚日逆市高收0.82元，升2仙，今年係公司上市10周年，相信會有好派送，多謝股東長年支持。
呢個月來，宜進利升幅唔細，但公司業務前景佳，後市仍可睇好。聽聞公司最近在日本做「路演」，基金反應好熱烈，重安排組團去睇廠，日本基金近年對中國概念股好有興趣，實地視察之後，相信會傾入股問題。
宜進利03年度（3月年結）中期盈利2395萬元，已上升38%，估計全年盈利可達6000萬元，每股加權盈利12.5仙（去年8月曾供股），中期已派息1.5仙，估計全年派息不少於4仙，現價PE約6.5倍，息率約5厘，04年度PE更低。
1集團購入美國分銷商OmniQuartz51%股權，直接拓展美國市場，每年營業額增加1億元，毛利率可提升20%。
2除原有的ODM和OEM業務，集團已進軍盈利較豐厚的OBM業務，預期04年度有盈利貢獻。
3現時在內地開設高檔鐘表售後服務中心，並引入國際品牌特許經營維修制度，以目前內地用戶擁有名牌鐘表達5000萬隻計，每隻維修費100至200元計，市場潛力極大，且好快會有盈利。
現年度，估計宜進利盈利可升至9000萬元，每股盈利16.3仙，預測PE僅5倍，近日股價升上0.8元水平整固，短期若升破高位0.84元阻力，上升目標1.05元。
郭兆誠