早上七時多店外便大排長龍，每個人都充滿期待的眼神，我還以為甚麼名牌波鞋又出了新款式，原來是為了搶看一本新書。在香港為一本書而排隊，記憶中好像從沒見過！上星期六，期待三年的《哈利波特》，終於推出第五集《鳳凰命令》，書迷早就養精蓄銳，誓要不眠不休，一日睇晒766頁！當中的感人場面，令FansTammy喊了一個鐘。也有些高深莫測的情節，使另一位Fans阿榮要全章再睇一次！還有是長大了的哈利還初嘗Kiss滋味……好了好了，講到這裏，還未看書的人可能已經撕爛報紙，不再看我的報道！還是保留一點神秘感，不把情節揭穿，究竟他跟哪個女仔Kiss呢？還是由你破解謎團吧！
記者：梁佩芬
攝影：楊錦文
服裝提供：EddyInternational
HarryPotter真係一集長過一集，《鳳凰命令》居然有近800頁，網上有人宣稱不眠不休花了十五小時看完，果真犀利！這集，哈利讀到五年級，當中一定經歷不少生離死別的事情，其中有很多人看了新書之後，竟然有五大不明白的地方，不如由幾位熟悉哈利的Fans，解釋一下。
疑問1
一至四集書中的英文都幾淺易，第五集的用語竟深奧了許多，好像「Dementor」這個字又點解呢？
英文確係深咗，但係睇慣一至四集，就知Dementor＝催狂魔，事關佢哋喺第三集曾經嚇到哈利由掃把跌咗落地。
疑問2
每集都有一場魁地奇比賽，第五集有沒有呢？
當然有啦，不過哈利無升任隊長，而是由AngelinaJohnson擔當，還新加入了榮恩當Keeper，AndrewKirke和JackSloper，同樣做Beater。
疑問3
說過有重要人物會死，是哪一位呢？
原來是哈利的……唔講畀你哋知。這段劇情很感人，當「他」與「食死人」決鬥時，中了咒語，跌進一道掛了簾幕的拱門後面。哈利波特想穿過拱門拯救「他」，卻眼巴巴看着「他」死去，而自己又欲救無從，哈利很傷心，我也流淚不止，太感人啦。（這個他是誰？當然不能寫，還有很多人未看這部書嘛！）
疑問4
常說哈利會談戀愛，今集究竟情歸何處？
Chapter21中，中國女生張秋走到哈利面前，將面貼近哈利說：「我真的喜歡你，哈利。」之後如何……究竟哈利與張秋有沒有Kiss呢？又係唔講得！總之哈利終於有初吻，也有初戀啦！
疑問5
點解五集裏面，都無講過魔法學校要交幾錢學費，難道鄧不利多校長等人不用出糧？
這個問題，我都無諗過，可能佢哋識魔法，識得變食物、水、電出來啦，又或者有七年免費教育呢！
多位哈利Fans，看罷五本書後，一齊選出五位最鍾意的角色，當然以哈利波特最多人鍾意，其他人選也令故事生色不少。
第1位
哈利波特
原因：無Harry就無古仔，佢千祈唔可以死呀！
第2位
妙麗
原因：高材生，臨危不亂還時常提出有用的建議，非常可愛。
第3位
海格
原因：最鍾意佢第一集在哈利生日那天，整蠱肥仔表哥達力，好好笑。而且，又成日唔覺意洩露一些機密事予哈利，令哈利又有更多奇遇！
第4位
鄧不利多校長
原因：從未見過咁好人的校長，成日加分畀學生。
第5位
天浪星
原因：佢對哈利非常好，令哈利感覺有如與父親同在般。
DVD第一集就快斷市
去旺角DVD舖頭，有兩三間的老闆都話，多得新書帶動，之前啲戲嘅碟都好賣咗，多數人都搵第一集，而且主攻DVD，試過一日賣晒10隻存貨，有些人轉買VCD，頂頂癮喎！至於第二集就重有，特別版畫面聲音都幾正！
睇報紙，教育學者話睇HarryPotter有助增進英文知識，可能都係，至少我學識Aragog是蜘蛛名，Apparate是現影術等。另外，還有些網頁連文章句子結構都有解釋，不妨一看。
說明句子結構
哈利波特常識問答
全盛期，哈利波特的電影產品有過百款，但一出就必掃清，好在經我努力搜括，終於都找到一些剩餘物資。
店舖資料
（a）廣視軟件專門店（21916082）
地址：旺角西洋菜街1A-1K
（b）奇趣天地（23654692）
地址：黃埔花園第一期金栢苑商場地下Shop5
（c）EddyInternational（26976916）
地址：火炭禾盛街11號中建電訊大廈901室