○二/○三球季西甲聯喺禮拜日先啱啱煞科，但德甲聯球隊拜仁喺日前就公布咗○三/○四球季球員號碼，其中「10」號個位重漏空咗㖭。
由於拜仁喺下月中要踢德國聯賽盃，以及備戰八月初展開嘅德甲聯，所以佢哋提早公布新一季球員號碼。新加盟嘅阿根廷中堅迪米基利斯同德國左後衞拉奧，分別獲分配「6」號同「15」號，其他舊將號數不變；即係話，一直懸空嘅「10」號重未名草有主。
拜仁較早前就話，佢哋睇中咗拉科嘅荷蘭前鋒馬卡爾及小保加嘅阿根廷前鋒泰維斯，但就只會二揀其一。計我求大俠話，泰維斯加盟拜仁機會較大。事關係人都知馬卡爾唔係太想去德甲效力。泰維斯今年得十九歲，但勝在價錢平，技術又唔錯；更重要嘅係，泰維斯喺小保加係着開「10」號，佢如果成為拜仁「10」號仔，都理所當然！
碧咸轉會皇馬一事成為城中熱門話題，啱啱入咗溫布頓網賽男單次圈嘅西班牙球手拉菲爾拿度亦出嚟湊湊熱鬧，話自己係皇馬番士，所以對碧咸選擇去皇馬感到相當高興。但係，佢阿叔拿度以前曾經效力巴塞隆拿，而且重係球隊主力，𠵱家佢咁講嘢，好唔畀面自己阿叔啫！
講開皇馬，呢支新鮮出爐嘅西甲聯冠軍喺禮拜一舉行祝捷會，重規定全部球員出席。但係，朗拿度就唔見咗人，據講佢有感冒；除朗拿度外，麥馬拿文亦玩失蹤。係人都知「老麥」愛出風頭，對皇馬不離不棄，俾人趕都唔走；佢今次一改常態，莫非有好路數？
艾拉維斯今屆喺西甲聯，搞到要降班；佢哋重會進行大清洗，其中曾經喺巴塞同曼聯效力嘅荷蘭前鋒祖迪告魯夫，亦難逃一劫，加入失業大軍行列。祖迪嘅成就雖及唔上老竇告魯夫，但假假哋都曾經係荷蘭國腳同只係二十九歲；𠵱家搞成咁，相信佢真係好難同佢老竇交代。
拉素班球星好似史譚同盧比斯等因不滿拉素用股份當糧出畀佢哋，紛紛叫走；但係意大利靚仔國腳後衞尼斯達雖然離開咗拉素，不過對舊球會重係有情有義。佢為咗支持拉素，攞錢出嚟買球會部份股份，重話呢個係精明投資！唔好再話靚仔冇本心嘞！
英乙球隊盧頓話佢哋委任前布力般球員紐維爾為新領隊，係順應民意，佢哋話紐維爾係球迷透過電話投票選出嚟。但係，盧頓球員係支持堅尼亞做領隊，佢哋球迷嘅意願亦同球員一樣，所以有球迷就話會方係特登造畀紐維爾。既然盧頓都屬意紐維爾做領隊，就咪假民主；𠵱家搞到紐維爾，真係唔知佢點面對班球員同球迷。