最近纖體後又弗又靚的張文慈，形容自己小時候又醜又蠢，街坊都叫她做醜小鴨，但她卻不介意，而她有次在家中如廁時，更踩爆屎坑，弄致小腿血流如注，要入醫院縫針。
張文慈從小性格內向，她上有一姊下有兩弟，排行第二的她，形容自己又醜又蠢，她記得小時在家中如廁時，竟論盡得踩爆屎坑。
張文慈日前說：「我幾兄弟姊妹細個時都有事發生，我大細佬被車車親，細細佬就浸親，家姐跌落化糞池，我就踩屎坑，嗰陣時屋企係用踎廁，我唔小心一腳踩爆咗個屎坑，隻腳重流晒血，要入醫院縫針，之後個屎坑重要補番㖭。」
張文慈又說：「我次次玩親都爭輸，玩乜都做後備，打波一定只做龍門，被人點落街買嘢嗰個實係我，豬頭骨我鯁晒，細個我住梨木樹邨，啲街坊嗌我做醜小鴨，嗰時我個嘴成日向下嘟，好低能，皮膚又黑，但我又冇理個樣係點，最緊要開心啫。」
張文慈以前是為食貓一名，家中有任何能吃的東西，她都夠膽吞進肚裏，她說：「我好鍾意食嘢，屋企食剩嘅冷飯，我可以攞啲豉油炒嚟食，嫲嫲出咗街打牌，我就攞廚房啲片糖嚟食，片糖冇晒就食黃糖，黃糖食晒就食冰糖，好擦得㗎，勁過老鼠，所以屋企人笑我似豬，唔係瞓就係食。」
張文慈坦言以前家境欠佳，所以生活非常節儉，她說：「我哋成家人會去城門水塘，釣吓魚，燒吓嘢食，去沙田行下山咁，一年飲茶最多兩次，我哋四個小朋友乜嘢都分四份，一個橙都分四份食，我啲嘢全部都係執家姐二攤，可能就因為咁，所以我大個之後對好多事都好珍惜，更加要畀心機賺錢養家。」
採訪：朱芷瑩
